मनसुनमा भैपरि आउने दुर्घटना र विपतहरू रोक्नका लागि गृहमन्त्री रमेश लेखकले मातहतका अधिकारीहरूलाई कडा निर्देशन दिएका छन्। उनले सडक सुरक्षालाई चुस्त र सुरक्षित बनाउनका लागि सम्बन्धित सबैलाई आचारसंहिता तथा पूर्वचेतावनीको ख्याल गर्न पनि भनेका छन्। 

गृहमन्त्रालयमा विपद्को पूर्व तयारी तथा प्रतिकार्य सम्बन्धी बैठकका क्रममा उनले सडक दुर्घटनालाई कम गर्नका लागि विभिन्न निर्देशनहरू जारी गरेका हुन्। उनले छिमेकी देशबाट नेपाल भित्रिने र देशभित्रै चल्ने मालबाहक सवारी साधनमा ओभरलोड गर्न नदिन र त्यसरी आउने ओभरलोड भएका मालबाहक ट्रकहरुलाई पूर्ण रुपमा नियन्त्रण गर्न निर्देशन दिएका छन्।  

गृह सचिव गोकर्णमणी दुवाडी, भौतिक पूर्वाधार तथा यातायात मन्त्रालयका सचिव केशव शर्मा, प्रहरी महानिरीक्षक दिपक थापा, सशस्त्र प्रहरी महानिरीक्षक राजु अर्याल लगायत सरोकारवालाहरु सहितको बैठकमा त्यस्तो निर्देशन दिएका हुन्। 

त्यस्तै वर्षा हुनसक्ने पूर्वानुमान गरिने वितिकै विपद् व्यवस्थापनसंग सम्बन्धीत राज्यका सबै संयन्त्रहरु चल्नु पर्ने र सडक क्षेत्रमा हुन सक्ने बाढी, पहिरो साथै जोखिमयुक्त सडकहरुमा सवारी आवागमन बन्द गर्न गृह मन्त्री लेखकले निर्देशन दिए।  

‘वर्षा हुने भनेपछि त्यस क्षेत्रमा सवारी चल्न दियो भने त्यहाँको प्रमुख जिल्ला अधिकारी, जिल्लाका प्रहरी प्रमुख, ट्राफिक प्रहरीका प्रमुखलाई कारबाही हुनेछ’ उनले भने। 

त्यसैगर यात्रुहरुको ज्यान जोगाउन उद्धार गर्ने चालकहरुलाई पुरस्कृत गरिने र जोखिमका कारण प्रशासनले सवारी चलाउन रोकेको सडकमा जबरजस्ती सविारी गडाउने जोकोहीलाई कारबाही गरिने समेत उनले बताए। उनले गत वर्ष यात्रुहरुको ज्यान सुरक्षित गर्दै आफ्नो ज्यान गुमाएका चालक मेघनाथ बिकलाई सरकारले सम्मान गरेको स्मरण गर्दै जोखिममा बहादुरी देखाउने दुस्साहस गरेर आफु र अरुको जीवनसंग खेलवाड नगर्न पनि यातायात मजदुरहरुलाई सुझाए। 

बैठकमा यातायात मजदुर तथा व्यवसायीहरुको तर्फबाट १७ बुँदे आचार संहिता प्रस्तुत गरिएको थियो। नेपाल यातायात स्वतन्त्र मजदुर संगठनका अध्यक्ष भीमज्वाला राईले प्रस्तुत गरेको आचार संहितामा प्रस्थान बिन्दुबाट गन्तव्यसम्मको सडकको अवस्था बारे जानकारी लिएर मात्रै यात्रा तय गरिने,  यात्रा तय गर्नु अघि सवारीसाधनको मर्मतसम्भार गरि यान्त्रिक अवस्था दुरुस्त राखिने,  प्रस्थान बिन्दु र गन्तव्य स्थानको विवरण खुलाई सबै यात्रुहरुको नाममा अनिवार्य टिकट उपलब्ध गराइने, सवारीसाधनको क्षमता भन्दा बढी यात्रु नचढाउने र मालबाहक सवारीसाधनमा मालसमानहरु ओभरलोड नगर्ने प्रतिवद्धताहरु रहेकाछन्। 

यस्तो छ मजदुर व्यवसायीहरुको साझा आचार संहिता-
सडक क्षेत्रमा हुनसक्ने विपद्बाट बच्न र बचाउन यातायात मजदुर तथा व्यवसायीहरुको साझा आचार संहिता हामी निम्न आचार संहिता पालना गर्न प्रतिवद्ध छौँ: 
१. प्रस्थान बिन्दुबाट गन्तव्यसम्मको सडकको अवस्था बारे जानकारी लिएर मात्रै यात्रा तय गर्दछौँ। 
२. यात्रा तय गर्नु अघि सवारीसाधनको मर्मतसम्भार गरि यान्त्रिक अवस्था दुरुस्त राख्नेछौँ।
३. प्रस्थान बिन्दु र गन्तव्य स्थानको विवरण खुलाई सबै यात्रुहरुको नाममा अनिवार्य टिकट उपलब्ध गराउँनेछौँ। 
४. सवारीसाधनको क्षमता भन्दा बढी यात्रु चढाउने र मालबाहक सवारीसाधनमा मालसमानहरु लोड गर्ने कार्य गर्ने छैनौँ। 
५. सडकको अवस्था र यातायात आवागमन बारे सञ्चार माध्ययमबाट अपडेड हुनेछौँ। 
६. सवारीसाधनमा यात्रारत यात्रुहरुको परिचय खुल्ने विवरण दुरुस्त राख्नेछौँ। 
७. यात्रुहरुलाई खाजा खाना तथा रिफ्रेसमेन्टका लागि सवारी रोक्दा वा विश्राम गर्दा सुरक्षित स्थानको पहिचान गरेर मात्रै गर्नेछौँ। 
८. सडकको अवस्थाको सूचनाका लागि प्रहरी, ट्राफिक प्रहरी, स्थानीय निकायसंग समन्वय गर्नेछौँ। 
९. यात्राका क्रममा मादक पदार्थ तथा नशालु पदार्थको प्रयोग नगर्ने र नगराउने प्रतिवद्धता गर्दछौँ। 
१०. सरकारले जारी गरेको निर्देशनहरुको पालना गर्नेछौँ। सवारीसाधन सञ्चालन गर्न रोकेको सडकमा जोखिम मोलेर जवरजस्ती सवारीसाधन सञ्चालन गर्नेछैनौँ। 
११. सवारीसाधनमा काम गर्ने श्रमिकहरुको पहिचान खुल्ने परिचयपत्र लगाएर मात्रै सेवा गर्न प्रतिवद्धछौँ।  
१२. सवारी साधन बाटोमा बिग्रीएमा वा रोकिने अवस्था आएमा यात्रुहरुलाई अलपत्र नहुने गरी वैकल्पिक व्यवस्था गर्नेछौँ । यात्रुहरुले मांग गरेमा भाडा फिर्ता गरिनेछ। 
१३. सवारी साधनमा यात्रुहरुलाई बाधा पुग्ने गरी म्युजिक तथा भिडियो सिस्टम चलाइने छैन् । लैङ्गिक हिंसालाई प्रोत्साहित गर्ने वा महिलाहरुको अपमान हुने खालको गीत, संगित वा भिडियो बजाइने छैन । 
१४. सवारी साधनका चालकले आवश्यक भएमा मात्र हर्नको प्रयोग गरिनेछ । हर्न निषेधित क्षेत्रमा हर्नको प्रयोग साथै प्रेशर हर्नको प्रयोग गरिनेछैन।
१५. लामो दुरीका सवारी साधनमा अनिवार्य रुपमा प्राथमिक उपचार  सामग्री राखिनेछ।
१६. यात्रा गर्ने महिला, बालबालिका, वृद्धवृद्धा र अशक्तहरुलाई सुरक्षित यात्रा गराउन प्रतिवद्ध छौँ । 
१७. सम्पूर्ण यात्रुहरुलाई यात्रुमैत्री व्यवहार गर्न प्रतिवद्ध छौँ।