सुडानका युद्धरत पक्षहरू शनिबारदेखि २४ घण्टे युद्धविराम गर्न सहमत भएको अमेरिका र साउदी मध्यस्थताकर्ताले जारी गरेको संयुक्त वक्तव्यमा उल्लेख छ।
'सुडानी सशस्त्र बल (एसएएफ) र र्यापिड सपोर्ट फोर्सेज (आरएसएफ)का प्रतिनिधिहरू जुन १० देखि स्थानीय समयानुसार बिहान ४ बजे २४ घण्टे देशव्यापी युद्धविराम गर्न सहमत भएका छन्,' साउदी विदेश मन्त्रालयले शुक्रबार जारी गरेको विज्ञप्तिमा भनिएको छ।
सुडानमा धेरै पटक युद्धविरामका लागि सहमति भएको छ र भङ्ग भएको छ। वासिङ्टनले दुई युद्धरत जनरलहरूमाथि प्रतिबन्ध लगाएको छ र दुवै पक्षलाई ‘भयानक’ रक्तपातको लागि दोषी ठहर्याएको छ।
'यदि युद्धरत पक्षहरूले २४ घण्टे युद्धविरामको पालना गर्न असफल भएमा सहजकर्ताहरूले साउदी शहर जेद्दाहमा गत महिनाको अन्त्यदेखि स्थगित गरिएको वार्ता स्थगित गर्न विचार गर्न बाध्य हुनेछन्,' मध्यस्थ प्रतिनिधिहरूले भने।
गत अप्रिलदेखि नियमित सेना र अर्धसैनिक बल आरएसएफबीच खार्तूम र डार्फरको पश्चिमी क्षेत्रमा युद्ध भएको थियो।
सशस्त्र द्वन्द्व स्थान तथा घटना तथ्याङ्क परियोजनाका अनुसार एक हजार ८०० भन्दा बढी व्यक्तिको मृत्यु भएको छ र संयुक्त राष्ट्रसङ्घका अनुसार करिब २० लाख मानिस विस्थापित भएका छन्, जसमध्ये चार लाख ७६ हजार छिमेकी मुलुकमा शरण लिएका छन्।
साउदी र अमेरिकी मध्यस्थकर्ताहरूले विगतका युद्धविरामहरूको असमान कार्यान्वयनप्रति सुडानी जनताको निराशामा आफूहरू पनि सहमत रहेको बताएका छन्।
“यदि यसको पालना गरियो भने जेद्दाह वार्ता पुनः सुरु गर्न अनुमति दिन सक्ने विश्वास निर्माण गर्ने उपायहरू अवलम्बन गर्न पक्षहरूका लागि २४ घण्टे युद्धविरामले महत्वपूर्ण अवसर प्रदान गर्नेछ,” विज्ञप्तिमा भनिएको छ।
अमेरिकी विदेशमन्त्री एन्टोनी ब्लिन्केनले साउदी अरबको तीन दिने भ्रमण सम्पन्न गरेको एक दिनपछि शुक्रबारको घोषणा आएको हो। साउदस् अरबमा उहाँले सुडानका बारेमा शीर्ष साउदी अधिकारीहरूसँग छलफल गरेका थिए।
