लमजुङको मर्स्याङ्दी कोरिडोरमा निर्माणाधीन २२० केभी राष्ट्रिय प्रसारण लाइन निर्माणकार्य रोक्न प्रभावितले माग गरेका छन्। आयोजना प्रभावित क्षेत्र दोर्दी–१ र २ का स्थानीयले आयोजनाले बल मिचाइ गरेको आरोप लगाएका हुन्।

प्रभावितहरूले प्रभावित समुदायलाई प्रहरी प्रशासन परिचालन गरी धाकधम्की दिने, धरपकड गर्ने तथा थुनामा समेत राख्ने गरेको भन्दै त्यसको विरोध गरेका छन्।

सोबाहेक युरोपेली लगानी बैकको उजुरी सुन्ने निकायले दिएको प्रतिवेदनको निष्कर्ष सुझावहरू अक्षरश कार्यान्वयन गर्न पनि माग गरेका छन्। लमजुङको मर्स्याङ्दी कोरिडोरअन्तर्गत राईनासको धमीलीकुवादेखि २२० केभी राष्ट्रिय विद्युत् प्रसारण लाइन निर्माणको क्रममा छ। 

प्रभावितहरूले अधिग्रहण गरिएको जग्गामा उचित मुआब्जा लगायतका विषयमा पटक–पटक प्रशासन कार्यालय र सरोकारवाला निकायको ध्यानाकर्षण गराउँदै आएका छन्।

आयोजना सुरु भएसँगै आन्दोलनरत प्रभावित क्षेत्रका बासिन्दाहरूले पछिल्लो समय आफ्ना माग पूरा नहुँदै प्रशासनको बलमा धम्काएर काम अघि बढाएको भन्दै त्यसको विरोध गरेका हुन्। 

बाहेक युरेपेली युनियनले निकालेको निष्कर्ष सुझावको आधारमा प्रभावितको सहभागितामा मुआब्जा पुनः मूल्याङ्कन गरी क्षतिपूर्ति निर्धारण गर्नुपर्ने, प्रभावित समुदाय, युरोपियन लगानी बैक र प्राधिकरणबीच त्रिपक्षीय वार्ता हुनुपर्ने प्रभावितहरूको माग छ।

प्रभावित समुदायको माग सुनुवाइ नहुँदासम्मका लागि आयोजना निर्माणकार्य रोक्न विशेष माग रहेको एफपिक लमजुङका सचिव चन्द्र मिश्रले बताए। राष्ट्रिय विद्युत् प्रसारण लाइन निर्माणको क्रममा गत आइतबार दोर्दी–१, ढोके गाउँकी पवित्रा थापालाई कुटपिट गरिएको, स्थानीय सन्तोष गिरि, सञ्जीव थापा र राजेश थापालाई प्रहरी नियन्त्रणमा लिएको भन्दै प्रभावितहरूले आक्रोश व्यक्त गरेका छन्।

यसअघि पनि मर्स्याङ्दी कोरिडोरअन्तर्गत राईनास, दोर्दी, बेसीसहर र मर्स्याङ्दी गाउँपालिकाका प्रभावितहरू पटक पटक आन्दोलनका कार्यक्रमहरू गर्दै आएका छन्। आफ्ना मागका विषयमा पटक–पटक सम्बन्धित निकायमा आग्रह गरे पनि सम्बोधन नगरेको उनीहरूको गुनासो छ।