जिउभरी ऐजेरु पलाएका मोरङ मिक्लाजुङ—५ का सुवास राईलाई हङकङबाट आर्थिक सहयोग भएको छ। हङकङमा रहेकी सोनु चाम्लिङको पहल कदमीमा संकलित १ लाख १६ हजार ६ सय ८० रुपैंया पीडित बिरामी राईलाई हस्तान्तरण गरिएको हो । हङकङबाट पठाइएको उक्त रकम चर्चित कलाकार उमेश राई ‘फुलन्देको आमा’ले हस्तान्तर गरे।

सुवास राईको ऐजेरु पलाएर दयनिय अबस्था रहेको र उपचारमा आर्थिक समस्या भएको खबर बिभिन्न सञ्चारमाध्यममा आएपछि सोनुको ध्यान खिचेको थियो । त्यसपछि सोनुले सामाजिक सञ्जाल मार्फत सहयोगको अपिल गरेकी थिईन् ।

सहयोग हस्तान्तरण कार्यक्रममा सुवासलाई हस्पिटल ल्याउन महत्वपूर्ण भुमिका खेलेका शंकर बजगाई बिरामीका भाई मोहन राई, बहिनी तारा राई लगायतको सहभागिता रहेको थियो । 

कार्यक्रममा बोल्दै कलाकार फुलन्देको आमाले बिरामीको स्वास्थ्य लाभको कामना गर्दै सहयोगीदाताप्रति धन्यवाद तथा आभार प्रकट गरे। आफ्नो तर्फबाट सहयोगको लागि सक्दो पहल गर्ने उनले बताए । 

सामाजिक सञ्जालमा कुराकानी गर्दै सोनु चाम्लिङले बिरामीसमक्ष सहयोग गर्न पाउँदा खुसी प्रकट गरिन् ।

यस्तै समाजसेवी शंकर बजगाईले सुवासपछि उनको भाईको पनि उस्तै समस्याले भएको उपचारका लागि हस्पिटलसँग सल्लाह गर्ने बताए ।