नेकपा (एमाले) स्थायी कमिटीको सोमबार ४ बजे बालुवाटारमा बस्ने बैठकले वरिष्ठ नेता माधवकुमार नेपाल, भीम रावलसहित केही नेताहरुलाई निष्कासन गर्ने तयारी गरेको छ। घनश्याम-योगेशले सोमबार प्रधानमन्त्रीसँग गरेको सहमति माधव नेपालसँग सल्लाह गरी भीम रावलले उल्टाइदिएपछि नेपाल र रावल आजै निष्कासनको निर्णय हुनसक्ने बालुवाटार स्रोतले जनाएको छ ।

नेपाल पक्षका नेताहरु घनश्याम भुसाल, योगेश भट्टराईले 'होटेल याक एण्ड यती' मा आइतबार राति सुवास नेम्वाङ र विष्णु पौडेलसँग सहमति गरेका थिए। त्यसबारे घनश्याम र योगेशले प्रधानमन्त्री केपी शर्मा ओलीसँग बालुवाटारमा सोमबार बिहान पनि छलफल गरेका थिए तर सहमतिविपरीत घनश्याम र सुरेन्द्र पाण्डे मुद्दा लिएर सर्वोच्च अदालत गएपछि सहमति उल्टिएको हो । आजै नेपाल, रावलसहित केही नेतालाई निस्कासनको निर्णय हुने भएको हो। एमाले स्थायी कमिटीको बैठक साेमबार अपरान्ह ४ बजेका लागि डाकिसकिएको छ ।

बालुवाटार स्रोतका अनुसार, नेपाल पक्षका नेताहरु घनश्याम भुसाल, योगेश भट्टराईलगायतले सोमबार प्रधानमन्त्रीसँग भेट गरी छलफल गरेका थिए। त्यसअघि कार्यदलमा रहेका सुवास नेम्वाङ र विष्णु पौडेलसँग छलफल भएको थियो। उक्त सहमति विपरीत भीम रावलले सर्वाेच्चमा मुद्दा हाल्ने बताएपछि नेपाल, रावलसहित केही नेता निस्कासित हुने सम्भावना प्रवल रहेकाे बालुवाटार स्राेतले जानकारी दियाे। 

प्रधानमन्त्री ओलीले भुसालले र भट्टराईसँगको भेटमा ०७५ जेठ २ को अवस्थामा फर्कने र पार्टीलाई मिलाएर अघि बढ्ने प्रतिबद्धता जनाएका थिए। नेपाल पक्ष सर्वोच्च अदालतमा मुद्दा हाल्नबाट पछि हट्ने र पार्टीलाई एकताबद्ध बनाएर लैजाने सहमति भएको स्रोतको दाबी छ।

उक्त सहमतिविपरीत साढे १२ बजे भीम रावलसँग टेलिफोनमा नेम्वाङको संवाद भएको थियो। ‘भीम रावलले फोन गरेर सुवास नेम्वाङ र विष्णु पौडेललाई भन्नुभएछ– मुद्दामा साथीभाइले हस्ताक्षर गरिसक्नुभएछ। मुद्दाबाट पछि हट्न मिलेन। त्यो गएर के भयो र, अब पार्टी मिलाउने काम गर्दै गरौँ। प्रधानमन्त्रीबाट ०७५ जेठ २ मा फर्कने प्रतिबद्धता आउन मुद्दाले के फरक पर्छ र ?’

पहिले छलफलका लागि पनि नगएका रावलको भनाइपछि प्रधानमन्त्रीनिकट र स्वयम् नेपाल पक्षका वार्ता गर्न गएकाहरु पनि निराश भएको स्रोतले जानकारी दियो।

आफ्नै पार्टीका प्रधानमन्त्री हटाएर कांग्रेस सभापति शेरबहादुर देउवालाई प्रधानमन्त्री बनाउन क्रियाशील नेताहरुमध्ये कम्तिमा पनि वरिष्ठ नेता नेपाल र भीम रावललाई आजै निष्कासनको कारवाही हुनसक्ने एमाले उच्च स्रोतले जानकारी दियो।