कोरोनाकालमा प्रेमिकाको जन्मदिन बाहिर मनाउने चक्करमा चर्चित फुटबल खेलाडी क्रिस्टियानो रोनाल्डोलाई आपत आइलागेको छ।
युभेन्ट्सका व्यवसायिक स्ट्राइकर रोनाल्डोले आफ्नो बच्चालाई जन्म दिएकी जर्जिना रोड्रिगेजको २७ औं जन्मदिन हालै मनाएका थिए। उनी जन्मदिन मनाउन पेडिमाउन्ट र भाले डि’ओस्टाको भ्रमणमा निस्किएका थिए। इटालियन सरकारले कोभिड–१९ का कारण आफ्नो नागरिकलाई सर्तकता अपनाउन भ्रमणमा प्रतिबन्ध लगाएको छ।
पोर्चुगलका यी सुपरस्टारविरूद्ध यात्रालाई लिएर इटालीको सरकारले छानवीन सुरु गरेपछि उनले सोसल मिडियाबाट घुमफिर गरेको फोटो हटाएका छन्। इटालीमा कोरोनाका कारण लाखौं प्रभावित भएका छन् भने हजारौंले ज्यान गुमाइसकेका छन्। भाले डि’ओस्टाको प्रहरीले यो प्रेमिल जोडीले कोरमायर स्की रिसोर्टको यात्रा गरेको खबरको पुष्टी गरिरहेको बताएको छ।
इटालीमा कोरोनाका कारण ओरेन्ज जोन घोषणा गरेको क्षेत्रमा जान कडाई गरिएको छ। इटाली मिडियाका अनुसार यो जोडी मंगलबार रिसोर्ट पुगेको थियो। एक दिन बसेर उनीहरू टुरिन फर्किएको बताइएको छ।
