हाम्रो देशको रंगमञ्चमा समयसमयमा विभिन्न नाटक मञ्चन भइरहन्छन्। अहिले पनि एउटा नाटक मञ्चन भइरहेको छ। नाटकको पृष्ठभूमि यस्तो छ— फुट्नुलाई आफ्नो मौलिक पहिचान बनाउँदै विभिन्न चिरामा विभाजित हुँदै आएको नेपाली वाम राजनीतिक दलहरूमध्ये केही समयअघि एकताबद्ध भएर प्रचण्ड नेतृत्वको माओवादी र ओली नेतृत्वको एमालेले जनतालाई एउटा नाटक देखाएका थिए। पद, सत्ता र शक्तिको भागबन्डा नमिलेपछि ती दलभित्र चुलिँदै गएको असन्तुष्टि अन्ततः तिनै दुई महान् कामरेडहरूका आपसी अभियोगका रूपमा छताछुल्ल हुन गयो।
दल एकीकरणको नौटंकीमा उभिएका एकै दलका दुई अध्यक्षबीचका गालीगलौज र कतिपय आपत्तिजनक अभियोग सार्वजनिक हुँदा सर्वसाधारणलाई कुरीकुरी लागेको थियो। धन्य यो मुलुकको लोकतान्त्रिक गणतन्त्र ! अनि कानुनी राज्य ! आफ्नै दलको प्रधानमन्त्रीलाई अध्यक्षले भ्रष्टाचार र कमिसनतन्त्रलाई प्रश्रय दिएको आदि असंख्य अभियोग लगाए। जबाफमा प्रधानमन्त्रीले अध्यक्षलाई व्यक्ति हत्याको भर्याङबाट सत्तामा आएको र स्थानीय निर्वाचनमा छोरीलाई जिताउन मतपत्र च्यातेको आदिजस्ता अनेकौं अभियोग लगाए।
