बैतडीमा साहु आफैँले चलाएकाे बस दुर्घटना हुँदा ९ जनाको मृत्यु भएको छ। अन्य ३४ जना घाइते भएका छन्।
बिहीबार राति १० बजेतिर दशरथचन्द राजमार्गअन्तर्गत बैतडीको पाटन नगरपालिका–८ खोड्पे नजिकै ना ५ ख ५१४१ नम्बरको बस दुर्घटना भएको हो।
बैतडी र दार्चुलाको सीमा क्षेत्र गन्नादेखि कञ्चनपुरको महेन्द्रनगरका लागि छुटेको पवनदूत यातायातको बस भीरबाट ६०० मिटर जति तल खसेको जिल्ला प्रहरी कार्यालय बैतडीका डिएसपी नारायणप्रसाद अधिकारीले जानकारी दिए।
मृतकमध्ये सात जना पुरुष र दुई जना महिला छन्। मृतकमध्ये आठ जनाको शव घटनास्थलबाट निकालिसकिएको छ भने एकजनाको शव बसमै रहेकाे छ।
उनीहरुकाे सनाखत हुन बाँकी छ।
दुर्घटनामा परी घाइते भएका ३४ जना मध्ये गम्भीर घाइते ७ जनालाई धनगढी रेफर गरिएको डिएसपी अधिकारीले बताए। बाँकी २७ जनाको डडेल्धुरा अस्पतालमा उपचार भइरहेको छ।
प्रहरी र स्थानीयबासी मिलेर राति नै घटनास्थलबाट घाइतेहरुको उद्धार गरिएको थियो।
मृतकको शव परीक्षणका लागि जिल्ला अस्पताल पठाइएकाे डिएसपी अधिकारीले जानकारी दिए।
दुर्घटना बारे थप अनुसन्धान हुँदैछ।
.jpg)
