दाङ जिल्लाको तलसीपुर उपमहानगरपालिका–१५ की एक महिला गत असार १४ गते १२ लाख बोकेर मलेसिया पैसा पठाउन हिमालयन बैंकको तुलसीपुर शाखामा पुगिन् । मलेसियामा गरेको कमाइ नेपाल पठाउने कुरा त स्वाभाविकै भए पनि नेपालबाट मलेसिया यतिधेरै पैसा पठाउनु अस्वाभाविक थियो ।
बैंकका कर्मचारीले जिज्ञासा राखे । १० लाख रुपैयाँभन्दा बढी पठाउँदा कारण समेत चाहिने भएकाले बैंकका कर्मचारीले सोधीखोजी गरेका थिए । आफ्ना श्रीमान् मलेसियामा बन्धक रहेकाले अपहरणमुक्त गर्न पैसा पठाउन लागेको जानकारी ती महिलाले बैंकका कर्मचारीलाई दिइन् । पैसा नपठाए श्रीमान्को ज्यान जाने चिन्ता उनले बैंकमा व्यक्त गरिन् ।
ती महिलाको कुरा तुलसीपुर शाखाका कर्मचारीले बैंकको काठमाडौंस्थित केन्द्रीय कार्यालयमा जानकारी गराए । नेपाली कामदार विदेशमा बन्धक भएका कारण बैंकको केन्द्रीय कार्यालयले केन्द्रीय अनुसन्धान ब्यूरो सीआईबी) का प्रमुख प्रहरी नायब महानिरीक्षक (डीआईजी) सहकूल थापालाई जानकारी दियो । सीआईबीले तत्कालै अनुसन्धानका लागि प्रहरी नायब उपरीक्षक (डीएसपी) को टोलीलाई खटायो ।
अनुसन्धान प्रक्रिया चल्दै गर्दा ती महिलाले पहिलो चरणमा १२ लाख रुपैयाँ मलेसियामा रहेका दुर्गाबहादुर श्रेष्ठको नाममा हिमालयन बैंकमार्फत पठाइन् । प्रहरीले ती महिलासँग सम्पर्क गर्यो । प्रहरीको परिचय लुकाउँदै गोप्य रूपमा कुरा बुझ्न खोज्यो । यसबीच ती महिलाले दोस्रो पटक असार १६ गते ३ लाख रुपैयाँ र तेस्रो पटक ९२ हजार रुपैयाँ फेरि पठाइन् । यसरी श्रीमान् अपहरणमुक्त गर्न ती महिलाले १५ लाख ९२ हजार रुपैयाँ मलेसिया पठाइन् ।
सीआईबीको टोलीले ती महिलाका श्रीमान्सँग सम्पर्क गर्न खोज्छ तर सम्भव हुँदैन । ती महिलाले आफ्नो पनि कुरा नभएको बताउँछिन् । पीडित परिवारको रूपमा सबै कुरा फुत्काउन नसकेपछि सीआईबीको प्रहरी टोलीले आफू अनुसन्धानमा खटिएको बताउँछ । त्यसपछि ती महिलाले सबै कुरा बताउँछिन् । मलेसियामा रहेका उनका श्रीमान् मद्म रैदाससँग प्रहरी टोलीले सम्पर्क गर्छ अनि अनुसन्धान प्रभावकारी रूपमा अगाडि बढ्छ ।
