कर्णाली प्रदेशमा आठ जना कोरोना संक्रमित निको भएर घर फर्कन लागेका छन्। प्रदेशका कोरोना संक्रमितमध्ये १२ जनाको रिपोर्ट नेगेटिभ आएको कर्णाली प्रदेश अस्पतालले जनाएको छ।
जसमध्य ८ जनालाई डिस्चार्ज गर्ने तयारी भइरहेको हाे। रिपोर्ट नेगेटिभ आएका ४ बालबालिका आमासँगै भएकाले डिस्चार्ज नगरिने अस्पतालका कोरोना रोग फोकल पर्सन डा. केएन पौडेलले बताए।
उनका अनुसार १ जना दैलेखका र अरु ७ जना सुर्खेतकालाई डिस्चार्जको तयारी भइरहेको छ।
कर्णाली प्रदेश अस्पतालमा हाल ६७ जना कोरोना संक्रमित उपचाररत् छन्। शुक्रबारसम्म कर्णालीमा ४ सय ८९ जनामा कोरोना संक्रमण देखिएको छ।
