प्रदेश नं २ का आठवटै जिल्लामा सोमबारसम्म कोरोना सङ्क्रमितको सङ्ख्या १३१ पुगेको छ।

 सामाजिक विकास मन्त्रालयद्वारा जारी कोरोनासम्बन्धी तथ्याङ्कमा गत आइतबारसम्म यो सङ्ख्या १२२ रहेको थियो।  सोमबार नौ नयाँ सङ्क्रमित भेटिएपछि यसको सङ्ख्या १३१ पुगेको हो।

कोभिड-१९ को संक्रमण रोक्नका लागि जारी रहेको लकडाउनलाई थप कडाइ बनाउन चिकित्सकले  सुझाव दिएका छन्। यस प्रदेशमा पहिलोपटक गत चैत २९ गते  वीरगञ्जमा तीन जनामा सङ्क्रमण देखिएको थियो।
 
 यसैबीच प्रदेश २ सरकारले आठवटै जिल्लामा किसानलाई ब्याजमा अनुदान दिने भएको छ। कृषि तथा पशुपालन व्यवसायका लागि बैंक तथा वित्तीय संस्थाबाट लिएको ऋण लकडाउनका कारण तिर्न नसकेपछि चैतदेखि असारसम्मको ब्याजमा अनुदान दिन लागेको कृषि ज्ञान केन्द्र पर्साका प्रमुख डा रामचन्द्र यादवले जानकारी दिए। 
 
सो ऋणको ब्याजमा चैत, वैशाख ,जेठ र असार गरी चार महिनाको लाग्ने ब्याजमा अनुदान दिने निर्णय गरेको उनको भनाइ छ। 

पर्सा जिल्लामा गत वर्षको तुलनामा यस वर्ष रु ४५ करोड ५० लाख मूल्य बराबरको १३ हजार मेट्रिक टन गहँु बढी उत्पादन भएको केन्द्रले जनाएको छ। किसानले २६ हजार हेक्टर क्षेत्रफलमा गहँुखेती गरी प्रतिहेक्टर तीन दशमलव एक मेट्रिक टन अर्थात ८० हजार १०० मेट्रिक टन गहँु उत्पादन गरेको छन्। अहिले बजारमा प्रतिकेजी रु ३५ का दरले गहुँ बिक्री हँुदै आएको छ।