कोभिड–१९ सङ्क्रमणको उच्च जोखिम रहेको भन्दै जिल्लाको सीमाक्षेत्र बेलहियाबासीले प्रमुख जिल्ला अधिकारीमार्फत प्रधानमन्त्री केपी शर्मा ओलीलाई ज्ञापनपत्र बुझाएका छन्।

 भारतबाट आउने मालवाहक कन्टेनर तथा ट्रकका चालक र सहचालकबाट कोभिड–१९ सङ्क्रमणको सम्भावना रहेको र  स्थानीयवासी, भन्सार कर्मचारी र एजेन्टमा सर्न सक्ने भएकाले उनीहरुको उचित व्यवस्थापन गर्न ज्ञापनपत्र बुझाइएको हो। 

प्रमुख जिल्ला अधिकारी महादेव पन्थलाई भेटेर १३ सूत्रीय ज्ञापनपत्र बुझाउँदै भन्सार क्षेत्रमा काम गर्ने कर्मचारी तथा मजदूर वर्गको स्वास्थ्य सुरक्षा गर्न, कार्यक्षेत्रमा काम गर्नेबीच सामाजिक दूरी कायम राख्न पहल गर्न र भन्सार भित्र आएका कन्टेनर तथा ट्रकमा पूर्णरुपमा सेनेटाइज गर्न माग गरेको स्थानीय बासिन्दा उज्ज्वल पोखरेलले बताए। 

'भन्सारभित्र प्रवेश गरेका चालक  तथा सहचालक भन्सारभित्र मात्र बस्ने व्यवस्था गर्न र भन्सारबाट निस्किएका मालवाहक साधनलाई गन्तव्यमा मात्र पुगेर रोक्न माग गरेका छौं' उनले भने। 

जिल्ला प्रशासन कार्यालय रुपन्देहीका अनुसार ज्ञापनपत्रमा  भन्सारभित्र काम गर्ने कर्मचारी, मजदूर, चालक तथा सहचालकले पञ्जा, मास्क र पूरा शरीर ढाक्ने लुगा प्रयोग गर्नुपर्ने, भन्सारमा काम गर्नेको स्वास्थ्य परीक्षण गर्नुपर्ने र भारतीय चालक तथा सहचालकको विवरण राख्नुपर्ने माग गरिएको छ।