कोरोना भाइरसको महामारी लगभग नियन्त्रणमा आएको चीनमा नयाँ चिन्ता थपिएको छ । आइतबार एकै दिन १०८ जना नयाँ संक्रमित भेटिएका छन् ।
पछिल्लो केही हप्ता यता एक दिन यति धेरै संक्रमित पुष्टि भएको यो पहिलो पटक हो । चीन सरकारले दिने गरेको आधिकारिक तथ्यांक अनुसार आइतबार पुष्टि भएको संक्रमण संख्या पछिल्लो पाँच हप्ता यताकै उच्च हो ।
आइतबार संक्रमण पुष्टि भएका मध्ये आधा उत्तरी प्रान्त हेलुङ्गजियाङ्गका छन् । सो प्रान्तमा केही चिनियाँहरु रुसबाट प्रवेश गरेका छन् ।
चीनले अन्तर्राष्ट्रिय उडान प्रवेश गर्न तथा अन्तर्राष्ट्रिय यात्री आउन नपाउने गरी कडा नियम लागु भए पनि नयाँ संक्रमण भने रोकिएको छैन ।
कोरोनाको उत्पति भएको हुबेइ प्रान्तमा नयाँ संक्रमण अति कम छ, तर पनि मानिसहरुको मृत्यु हुने क्रम रोकिएको छैन । हुबेइमा आइतबार थप दुईजनाको मृत्यु भएको छ ।
