स्पेनमा कोरोना भाइरसको संक्रमणका कारण मृत्यु हुनेको संख्या लगातार चौथो दिन घटेको छ। सोमबार लगातार चौथो दिन मृत्यु हुनेको संख्या घटेको र पछिल्लो १३ दिन यताकै सबैभन्दा कम व्यक्तिको ज्यान गएको हो।
सोमबार स्पेनमा ६३७ जनाको ज्यान गएको स्वास्थ्य आपतकाल कमिटिले जनाएको छ ।
स्पेनमा मृत्यु हुनेको कुलसंख्या १३ हजार ३४१ रहेको छ । अहिलेसम्म कुल संक्रमितको संख्या एक लाख ३६ हजार ६७५ रहेको छ ।
विश्वमै सबैभन्दा बढी प्रभावित भएको इटालीमा सोमबार मृत्यु हुनेको संख्या अघिल्ला दिनको तुलनामा केही बढेको छ। सोमबार ६३६ जनाको मृत्यु भएको इटाली सरकारले जनाएको छ ।
यो संख्या आइतबारको भन्दा १११ ले बढी हो । आइतबार मार्च १९ यता इटालीमा सबैभन्दा कम मानिसको मृत्यु भएको थियो । तर सोमबार मृत्यु हुनेको संख्या शनिबारको भन्दा कम हो ।
इटालीमा अहिलेसम्म १६ हजार ५२३ जनाको संक्रमणपछि मृत्यु भएको छ । नयाँ संक्रमणको दर इटालीमा लगातार कम हुँदै गएको छ । अहिलेसम्म इटालीमा कुल संक्रमितको संख्या एक लाख ३२ हजार ५४७ रहेको छ ।
कोरोना भाइरसको संक्रमणका कारण विश्वभर अहिलेसम्म ७४ हजार ६३५ जनाको मृत्यु भएको छ । त्यसमध्ये ५० हजार भन्दा बढी युरोपका छन् ।
विश्वभर कुल संक्रमितको संख्या १३ लाख ४४ जहार भन्दा बढी पुगेको छ । अहिलेसम्म दुई लाख ७८ हजार ३३० जनामा संक्रमण निको भएको छ।
