कोरोना भाइरसका कारण सोमबार बिहानसम्म १२ लाख ७२ हजार मानिस संक्रमित भएका छन्। यस्तै ६९ हजर तीन सय ५० जनाको मृत्यु भएको छ भने दुई लाख ६० हजार मानिस निको भएर घर फर्किएका छन्।
इटलीमा दुई हप्तापछि मृत्यु हुनेको संख्यामा कमी आएको छ। आइतबार इटलीमा ५ सय २५ जनाको मृत्यु भएको छ। इटलीमा अहिलेसम्म १५ हजार ८ सय ८७ जनाको मृत्यु भइसकेको छ।
स्पेनमा गएको २४ घण्टामा ६ सय ७४ जनाको मृत्यु भएको छ। यो स्पेनमा एक हप्तायता २४ घण्टा अवधिमा मृत्यु हुने सबैभन्दा कम संख्या हो। स्पेनमा अहिलेसम्म १२ हजार ६ सय ४१ जनाको मृत्यु भएको छ र अहिलेसम्म १ लाख ३१ हजार भन्दा बढीमा यो रोगको संक्रमण देखिएको छ।
अमेरिकामा संक्रमण लगातार बढ्ने क्रममा छ। अमेरिकामा संसारमै सबैभन्दा बढी ३ लाख ३५ हजार मानिसमा यो भाइरसको संक्रमण देखिएको छ। यहाँ मृत्यु हुनेको संख्या ९ हजार ५ सय ६२ पुगेको छ। अमेरिकाको न्युयोर्क सिटी सबैभन्दा बढी प्रभावित भएको छ। न्युयोर्कमा मात्र २ हजार २ सय ५६ जनाको मृत्यु भएको छ।
अमेरिकापछि सबैभन्दा बढी प्रभावित देश फ्रान्स बनेको छ। जहाँ ८ हजार मानिसको मृत्यु भइसकेको छ। बितेको २४ घण्टामा यहाँ मृत्यु हुनेको संख्या ३ सय ५७ पुगेको छ, शनिबार भने यहाँ ४ सय ४१ जनाको मृत्यु भएको थियो। फ्रान्समा अहिलेसम्म ९० हजार भन्दा धेरैमा संक्रमण देखिएको छ।
बेलायतमा बितेको २४ घण्टामा ६ सय २१ जनाको मृत्यु भएको छ। यहाँ मृत्यु हुनेको संख्या ४ हजार ९ सय ३४ पुगेको छ। संक्रमितको संख्या ४८ हजार भन्दा बढी पुगेको छ। बेलायतका प्रधानमन्त्री बोरिस जोनसोन पनि अस्पताल भर्ना भए भएका छन्।
