अमेरिकामा कोरोना भाइरस संक्रमितको संख्या बढे पनि बिहीबार मृतकको संख्या भने घटेको छ। बुधबार १०४९ नागरिक गुमाएको अमेरिकाले विहीबार यो समाचार तयार पारिरहँदा ९६८ लाई मात्र गुमाएको छ। एकैदिन यतिका संख्यामा मानिसको मृत्यु कुनै पनि अर्थमा प्रिय समाचार हैन तर हिजोभन्दा घट्नु अवश्य पनि एक शान्त्वना समाचार हो।
यो संख्यासँगै अमेरिकामा मृतकको संख्या ६,०७० पुगेको छ। तर, खुशीको कुरा मृतकको संख्याभन्दा धेरै बढी अमेरिकीले कोरोनालाई पराजित गरेर जीवनको समाचार सम्प्रेषित गरेका छन्। यो समाचार तयार पारिरहेको यतिबेलासम्म १०,४०३ अमेरिकी निको भएर घर फर्केका छन्। तर, कोरोना संक्रमितको संख्या भने बुधबारभन्दा उकालो लागेको छ। बुधबार २६,४७३ संक्रमित भएकोमा विहीबार यो समाचार तयार पारिरहेको बेला २९,४३० संक्रमित भैसकेका छन। विहीबारको यो संख्यासँग अमेरिकामा संक्रमितको संख्या २४४,४३३ पुगिसकेको छ।
