बेलायती राजकुमार ह्यारी-मेगन दम्पतिले आफ्नो पहिलो सन्तानको तस्विर सार्वजनिक गरेका छन्। 

बेलायती महारानीको आठौ नाति जन्मेको तीन दिनपछि उनीहरूले तस्विर सार्वजनिक गरेका हुन्। 

पहिलो सन्तान पाएर खुशी भएकी मेगनले भनिन्, "यो चमत्कारजस्तै छ। एकदमै आश्चर्यलाग्दो छ। विश्वकै दुई उत्कृष्ट पुरुष मसँग छन्, त्यसैले म निकै खुसी छु।"

राजकुमार ह्यरीले भने, "यो एकदमै ठूलो कुरा हो। अभिभावकत्व ग्रहण गर्नु एकदमै रमाइलो कुरा हो।अहिले जम्मा तीन दिन भयो, तर हामी हाम्रो खुसीको आधार पाएर एकदमै उत्साही छौँ।"

बच्चा को जस्तो देखिन्छ भन्ने प्रश्नमा ह्यारीले भने, "बच्चा दुई हप्तामा नै धेरै परिवर्तन हुन्छ भनेर मलाई धेरैले भनेका छन्।"

"हामी कसरी परिवर्तन हुन्छ भनेर आउँदो महिनासम्म हेर्नेछौँ। तर उनको अनुहार प्रत्येक दिन परिवर्तन भइरहेको छ त्यसैले कसलाई के थाहा।"

बेलायती राजगद्दीका लागि सातौँ स्थानमा रहेका शिशु सोमवार ५ बजेर २६ मिनेटमा जन्मिएका हुन्। उनको नाम भने अझै पनि राखिएको छैन। 

राजकुमार ह्यारी र मेगनलाई सन्तान प्राप्त भएकोमा राजदरवारका हरेक सदस्यसँगै बेलायती जनता खुशी मनाइरहेका छन्। 

यसले पनि बेलायतमा राजपरम्परा कति जनप्रिय छ भन्ने पुष्टी हुन्छ।