बेलायतको राजपरिवारसँगै बेलायतमा खुशी छाएको छ। यो खुशी बेलायती राजकुमार ह्यारी र राजकुमारी मेगनको छोरा जन्मिएर प्राप्त भएको हो । उनीहरूको विवाह भएको ११ महिनामा छोरा जन्मिएको हो।
मेगनले स्थानीय समयअनुसार सोमबार ५ बजेर २६ मिनेटमा ३ दशमलव २ किलोग्रामको स्वस्थ बच्चा जन्माएकी हुन्।
अहिले जन्मिएका शाही शिशु महारानीका आठौँ पनाति हुन्। उनको नाम के राख्ने भनेर सोचिरहेको राजकुमार ह्यारीले बताएका छन्।
आफ्नो छोराको जन्मपछि बोल्दै राजकुमार ह्यारीले आफूले सम्भवत: कल्पनै नगरेको सुखद अनुभूति भएको बताएका छन्। उनले आफूहरू दुवैजना एकदमै खुसी भएको भन्दै मेगन गर्भवती हुँदा सर्वसाधारणले देखाएको समर्थनका लागि धन्यवाद दिएका छन्।
गत वर्ष १९ मेमा ह्यारीले मेगनसँग विवाह गरेका थिए। बेलायती राजपरिवारको बिहेमा करिब ८४ मिलियन पाउण्ड खर्च भएको थियो।
विवाह अगाडि नै ह्यारीलाई ‘ड्युक अफ ससेक्स’ को उपाधिबाट सम्मानित गरिएको थियो। बिहेपछि मेगनले ‘डचेज अफ ससेक्स’ को उपाधि पाएका थिइन।
