दक्षिण अफ्रिकाको दर्बानस्थित उच्च अदालत रहेको भवनमा गोली चल्दा कम्तिमा तीन जनाको मृत्यु भएको र भने ६ जना अन्य घाइते भएको प्रहरीले जानकारी दिउको छ।

प्रहरी प्रवक्ता थेम्वेका एमबेलेले घटनाको पुष्टि गर्दै एएफपीसँग भने, ‘एक बन्दूकधारीले चलाएको गोली लागी तीन जनाको मृत्यु भएको छ। मृतकमध्ये एक जना नगर प्रहरीसमेत छन्।’

‘मृतक अन्य दुई जना महिला छन् भने उनीहरूको सनाखत हुन सकेको छैन,’ आकस्मिक उद्धार सेवाकी उद्धार परिचालन शाखाकी निर्देशक गारिथ यामिन्सनले भनिन्, ‘घाइते ६ जनामध्ये पाँच जनालाई गम्भीर चोट लागेकाले अस्पतालमा उपचारका लागि पठाइएको छ।’

उद्धारका लागि आफ्नो टोली तत्काल घटनास्थलमा पुगेको तर घटनास्थलमा रगतको आहाल देखिएको उनले बताए।

गोली भवनको पहिलो तल्लामा चलेको र उक्त स्थान शहरको उच्च अदालतनजिकै रहेको सुरक्षाकर्मीले बताएका छन् ।

स्मरण रहोस, सोही शहरमा विदामा रहेका एक प्रहरीले सम्बन्धविच्छेद मामिला हेर्ने अदालतमा गोली चलाई सम्बन्ध विच्छेद गरेकी आफ्नी पूर्व श्रीमती र उनका भाइको हत्या गरेका थिए ।