काठमाडौं । इलामका राम भट्टराईको दैनिकी अहिले फेरिएको छ । उनी लामो समयसम्म गैरसरकारी संस्थामा काम गरे । गैर सरकारी संस्थामा काम गर्दादेखि नै उनलाई नयाँ काम कसरी गर्ने भन्ने हुटहुटी चलिरहन्थ्यो । केही साथीभाइसँग सल्लाह पनि गरे । नयाँ कामका विषयमा छलफल भइरहेका बेला प्रधानमन्त्री केपी शर्मा ओलीले नेपालमा पानीजहाज र रेलको कुरा तीव्रताका साथ अघि सारे ।
त्यसबेला नै पानीजहाज नेपालमा सञ्चालन गर्न सकिन्छ कि सकिँदैन अर्थात् नेपालबाट गोवा र मलेसिया पुग्ने पर्यटकलाई नेपालमै राख्न सकिने पानी सम्बन्धी अन्य कस्ता काम होलान् ? यिनै विषयमा छलफल चल्दाचल्दै कोशीमा पानी जहाज सञ्चालन गर्ने तयारी पनि अघि सारे । “हामीले छलफल गर्दागर्दै कोशीमा चल्ने पानीजहाज कहाँ बनाउने, कसरी ल्याउने भन्ने विषयमा अध्ययन गर्न चीन पनि पुग्यौं,” नारायणीको किनारमा उभिएर भट्टराईले बाह्रखरीसँग भने ।
