प्रधानमन्त्री केपी शर्मा ओलीले सरकारले कर्मचारी हटाउने र नयाँ जिम्मेवारी दिने प्रक्रिया सामान्य भएको दाबी गरेका छन्।
नेपाल विद्युत् प्राधिकरणका निवर्तमान कार्यकारी निर्देशक कुलमान घिसिङलाई लक्षित गर्दै उनले एकजना कर्मचारीको विषयमा प्रश्न उठाएर सदन अबरुद्ध गरी महत्वपूर्ण संसदीय कार्यमा बाधा पुग्न नहुने बताएका हुन्।
विपक्षीका प्रश्नको सोमबार प्रतिनिधिसभा बैठकमा जवाफ दिँदै प्रधानमन्त्री ओलीले मन्त्रीप्रति इमानदारिता नभएको कर्मचारी हट्नु सामान्य प्रक्रिया भएको बताएका थिए।
000
राष्ट्रियसभाले पाँच वटा प्रतिस्थापन विधेयक बहुमतले पारित गरेको छ।
आजको बैठकमा सभाका अध्यक्ष नारायणप्रसाद दाहालले सबै विधेयक बहुमतले पारित भएको जानकारी गराएका हुन्।
‘सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने विधेयक, २०८१’, ‘सहकारीसम्बन्धी केही नेपाल ऐनलाई संशोधन गर्ने विधेयक, २०८१’, ‘आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८१’ तथा ‘निजीकरण (पहिलो संशोधन) विधेयक, २०८१’ र ‘आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्ने विधेयक, २०८१’ पारित गरिएको हो।
यो पनि-
000
राष्ट्रिय स्वतन्त्र पार्टीका सभापति रवि लामिछानेले वर्तमान दुई तिहाईको सरकारले आफूलाई जिउँदै छोड्नु नै आफ्नो जित भएको बताएका छन्।
सोमबार रास्वपाको केन्द्रीय समितिको विशेष बैठकमा सम्बोधन गर्दै उनले लोकतन्त्र, गणतन्त्रको आडमा लुटतन्त्र मच्चाईरहेको भन्दै त्यसको खबरदारी गर्न शरीरमा एक थोपा रगत भएसम्म पछि नहट्ने बताएका हुन्।
सरकारको आफूमाथिको षड्यन्त्रको शिलशिला अझै नसकिएको भन्दै कुनै दिन पनि हार नमानेको र मान्नेवाला पनि नरहेको उनकाे जिकिर थियाे।
000
नेकपा एकीकृत समाजवादीका नेता झलनाथ खनालले पूर्वराजा ज्ञानेन्द्र शाह मूर्तिचोर भएको दाबी गरेका छन्।
सोमबार पार्टी निकट खेलकुद महासंघले गरेको कार्यक्रमलाई सम्बोधन गर्दै उनले यस्तो दाबी गरेका हुन्।
नेपालको मूर्ति बेचेर नेपालमा सबैभन्दा पहिलो पटक हेरोइन भित्र्याउने मान्छे पूर्वराजा ज्ञानेन्द्र नै भएको उनको आरोप थियो।
000
नेकपा माओवादी केन्द्रकी सांसद रेखा शर्माले वर्तमान संघीय लोकतान्त्रिक गणतन्त्रात्मक व्यवस्थाको विकल्प राजतन्त्र हुनै नसक्ने दाबी गरेकी छन्।
सोमबार प्रतिनिधिसभाको बैठकलाई सम्बोधन गर्दै उनले राजतन्त्रतिर जाने कुरा विकल्प नभएर पश्चगमनमात्रै रहेको बताएकी हुन्।
पश्चगमनको पक्षमा आफूहरू यसअघि कोहीपनि नरहेको र नहुने पनि बताएकी थिइन्।
000
कतार सरकारले विभिन्न मुद्दामा बन्दी जीवन बिताइरहेका १८ जना नेपालीलाई आममाफी दिएको छ।
उक्त आममाफी इस्लाम धर्मावलम्बीहरूको पवित्र महिना रमजान र इद पर्वको अवसरमा प्रदान गरिएको हो।
यसका लागि परराष्ट्र मन्त्रालयले कतार सरकारलाई धन्यबाद दिएको छ।
यो आममाफीले नेपाल र कतारबीच द्विपक्षीय सम्बन्धमा अझ बलियो भूमिका खेलेको परराष्ट्र मन्त्रालयले जनाएको छ।
000
वरिष्ठ पत्रकार एवं पूर्वराजदूत कमल कोइरालाको सतासी वर्षकाे उमेरमा निधन भएकाे छ।
उनको सिनामंगलस्थित केएमसी अस्पतालमा उपचारका क्रममा आइतबार साँझ मृत्यु निधन हो।
केही दिनअघि घरमै लडेका कोइरालालाई उपचारका लागि केएमसी भर्ना गरिएको थियो।
पूर्वप्रधानमन्त्री मातृकाप्रसाद कोइरालाका छोरा कमलले दक्षिण कोरियाका लागि नेपाली राजदूत भएर काम गरेका थिए।
000
इरानले अमेरिकी राष्ट्रपति डोनाल्ड ट्रम्पको प्रत्यक्ष वार्ता गर्ने प्रस्ताव अस्वीकार गरेको छ।
इरानी राष्ट्रपति मसुद पेजेस्कियानले इरानको द्रुत गतिमा बढिरहेको आणविक हतियार कार्यक्रम रोक्नेबारे प्रत्यक्ष वार्ता गर्ने ट्रम्पको प्रस्ताव अस्वीकार गरेको आधिकारिक रूपमा पुष्टि गरेको भनेर अमेरिकी अनलाइनले लेखेको छ। यसले अमेरिका र इरानबीच तनाव थप बढ्न सक्ने देखिएको छ।
