ललितपुरकाे च्यासलमा गएराति एक जनाकाे हत्या भएकाे छ। सुनसरी घर भइ ललितपुरकाे सातदाेबाटाेमा बस्दै आएका २३ वर्षीय नयन गुरुङकाे चक्कु प्रहार गरेर हत्या भएकाे हाे।
साेमबार राति ९:२० बजे च्यासलस्थित टाउन हव क्याफेमा उनीमाथि चक्कु प्रहार भएकाे थियाे। त्यसलगत्तै ग्वार्काेस्थित बिएण्डबी अस्पतालमा गुरुङकाे उपचारका क्रममा गएराति १०:५ बजे मृत्यु भएकाे जिल्ला प्रहरी परिसर ललितपुरले जानकारी दिएकाे छ।
हत्यामा संलग्न रहेकाे आराेपमा डडेल्धुरा घर भइ च्यासलकाे टाउन हव क्याफेमा काम गर्दै आएका २६ वर्षीय हेमराज भट्ट पक्राउ परेका छन्। उनीमाथि अहिले अनुसन्धान भइरहेकाे प्रहरीले बताएकाे छ।
क्याफेमा बिल तिर्ने विषयमा विवाद हुँदा घटना घटेकाे प्रहरीकाे प्रारम्भिक अनुसन्धानबाट खुलेकाे छ।
‘गुरुङसहित ७–८ जना साथीहरू परीक्षामा पास भएकाे खुसीयालीमा क्याफेमा पार्टी गर्न पुगेका रहेछन्। पार्टी गरेर बिल तिर्दा क्याफेका स्टाफ भट्टसँग विवाद भएको रहेछ। त्यसपछि भट्टले चक्कु प्रहार गर्दा गुरुङकाे मृत्यु भएकाे बुझिएकाे छ’, प्रहरी स्राेतले भन्याे।
विवाद बिल तिरिसकेपछि भएकाे पनि अनुसन्धानबाट खुलेकाे छ। ‘खासमा मृत्यु भएका गुरुङसहितका साथीहरू बिल तिरेर निस्किएका रहेछन्। त्यसपछि फेरि उनै गुरुङ र अर्का एक जना साथी क्याफेमा फर्किएर विवाद भएपछि चक्कु प्रहार भएकाे बुझिएकाे छ’, स्राेतले भन्याे।
यद्यपि घटनाकाे अहिले अनुसन्धान भइरहेकाे छ। प्रहरीका अनुसार अनुसन्धानका लागि अन्य व्यक्तिकाे पनि खाेजी भइरहेकाे छ। भट्टलाई भने प्रहरीले गएराति नै पक्राउ गरेकाे हाे।
.jpg)
