उपप्रधानमन्त्री एवं गृहमन्त्री रवि लामिछानेले आफ्नाे पार्टीबाट मन्त्री बनेकाहरुले एउटा पनि नराम्रो काम नगरेकाे दाबी गरेका छन्।

नेपाल समाजवादी पार्टीको स्थापना दिवसका अवसरमा बुधबार काठमाडाैँमा आयोजित कार्यक्रममा बाेल्दै उनले यस्ताे बताएका हुन्। 

‘सबै गर्न सकिँदैन तर, धेरै गर्न सकिन्छ’ भन्ने आस र भरोसाकासाथ आफूहरु अघि बढेको भन्दै उपप्रधानमन्त्री लामिछानेले भने, ‘तीन महिना सरकारमा बसेर मेरो पार्टीबाट मन्त्री बनेकाहरुले एउटा पनि नराम्रो काम गरेका छैनन्, राम्रा काम भएका छन्।’

उनले वर्तमान सरकारले मुलुकको आवश्यकता र जनताको हितमा काम गरिरहेको बताएका छन्। गृहमन्त्री लामिछानेले सरकारमा रहुञ्जेल नागरिकलाई दुःख नदिने गरी काम गर्ने उल्लेख गरे।

उपप्रधानमन्त्री लामिछानेले विभिन्न सङ्घर्ष र बलिदानबाट प्राप्त व्यवस्थालाई आत्मसाथ गर्दै नागरिकको सपनालाई साकार पार्न अहिलेको व्यवस्थाप्रति कटिबद्ध भएर लागेको बताए।

राष्ट्रिय स्वतन्त्र पार्टी (रास्वपा) का सभापतिसमेत रहेका उनले प्रदेश संरचनालाई लिएर धेरै प्रश्नहरु उब्जिएकाले संविधानको भावना र परिकल्पना अनुरुप प्रदेश सञ्चालन गरिनुपर्नेमा जोड दिए।

‘प्रदेश संरचनालाई लिएर धेरै जिज्ञाशा उब्जिएका छन्। यसमा सुधार गरेर अघि बढ्नुपर्छ’, उनले भने। उपप्रधानमन्त्री लामिछानेले नागरिकलाई दुःख नदिइकन परिवर्तनका लागि आफूहरु मुद्दामा एक भएर अगाडि बढ्ने धारणा राखे।