युएईमा आज भव्य हिन्दु मन्दिरको उद्घाटन हुँदै

संयुक्त अरब ईमिरेट्स (युएई) मा मध्यपुर्वकै पहिलो एवम् दक्षिण एसिया बाहिरको सबैभन्दा ठूलो हिन्दु मन्दिरको उद्घाटन हुँदैछ।

युएईको राजधानी अबुधाबीमा निर्मित भव्य हिन्दु मन्दिरको आज भारतिय प्रधानमन्त्री नरेन्द्र मोदिले उद्घाटन गर्न लागेका हुन।

२७ एकड जमिनमा फैलिएको स्वामी नारायणको भव्य मन्दिरको शिलान्यास २० अप्रिल २०१९ मा गरिएको थियो। सन २०१५ मा भएको भारतीय प्रधानमन्त्री नरेन्द्र मोदिको युएई भ्रमणका क्रममा युएईले अबुधाबीमा हिन्दु मन्दिर निर्माण गर्न जमिन दिने घोषणा गरेको थियो। अबुधाबीको मुख्य शहरबाट झन्डै ५० किलोमीटरको दुरिमा रहेको मन्दिरको निर्माण बाप्स स्वामिनारायण संस्थाले गरेको हो।

युएईको ७ राज्यको प्रतीक स्वरुप ७ शिखर र ४१० स्तम्भ रहेको पिरामिड शैलिको यस मन्दिरको उचाई १०८ फिट, लम्बाई २६२ फिट र चौडाई १८० फिट रहेको छ। ईस्लामिक देशमा हिन्दु संस्कृतिप्रतिको सहिष्णुता र सम्मानको प्रतिकको रूपमा निर्माण गरिएको यस मन्दिरको संरचना १३.५ एकडमा निर्माण गरिएको छ भने १३.५ एकड जमिनमा पार्किङ सहित अन्य संरचना निर्माण गरिएको छ। मन्दिरको बाहिरी तहमा 'पिंक राजस्थान मार्वल' प्रयोग गरिएको छ भने भित्री तहमा 'ईटालियन व्हाईट मार्वल' को प्रयोग गरिएको छ।

फलाम, आल्मुनियम लगायतका धातुहरुको प्रयोग नगरी निर्माण गरिएको मन्दिरमा भारतिय शिल्पकारहरुले निर्माण गरेका विभिन्न स्वरुप र आकृतिका कलाहरु देख्न पाईन्छ। ४ वर्षमा निर्माण पूरा गरिएको मन्दिर निर्माणमा ४ सय मिलियन दिराम खर्च भएको बताईएको छ।

मन्दिर परिसर भित्र हिन्दु धर्मावलम्बीका विभिन्न संस्कारहरु सञ्चालन गर्न छुट्टै हलको समेत निर्माण गरिएको छ। जहाँ जन्मदेखि मृत्युसम्मका सम्पुर्ण हिन्दु संस्कारहरु गर्न सकिनेछ। स्वामिनारायण संस्थाका महन्थले सन् १९९७ मै युएईमा हिन्दु मन्दिर निर्माण गर्ने परिकल्पना गरेको बताईएको छ।

आज साँझ भारतिय प्रधानमन्त्री नरेन्द्र मोदिको विशेष उपस्थितिमा मन्दिरको उद्घाटन गरिनेछ भने १८ फेब्रुअरी देखि सर्वसाधारणका लागि आंशिक रूपमा खुला रहनेछ। आगामी मार्च १ देखि भने सबैका लागी मन्दिर खोलिने बताईएको छ।