लमजुङका आठवटै स्थानीय तहले समयसिमा भित्रै आगामी आर्थिक वर्षका लागि बजेट, नीति तथा कार्यक्रम ल्याएका छन्।

जिल्लाका आठ स्थानिय तहले चार अर्ब एक करोड ५९ लाख एक हजार बजेट ल्याएका छन्।

जिल्लामा सबैभन्दा धेरै सन्दरबजार नगरपालिकाले आगामी वर्षका लागि ७९ करोड ७५ लाख ८० हजार रुपैयाँ बजेट ल्याएको छ।

असार ८ गते नै निति तथा कार्यक्रम ल्याएको नगरपालिकाले आगामी आर्थिक वर्षका लागि निति कार्यक्रम र बजेट पारित गरेको नगरप्रमुख कृष्ण प्रसाद कोइरालाले बताए।

नगरपालिकाले चालुतर्फ ६५ दशमलव ६ प्रतिशत अर्थात ५२ करोड ३२ लाख ८८ हजार रुपैयाँँ र पुँजीगत तर्फ २७ करोड ४२ लाख ९२ हजार अर्थात ३४ दशमलव ४ प्रतिशत बजेट विनियोजन गरेको हो।

जिल्लाको सदरमुकाम समेत रहेको बेसीशहर नगरपालिकाले आर्थिक वर्ष ०७९/८० को लागि ७५ करोड ५३ लाख तीन हजार रुपैयाँ बजेट ल्याएको छ।

आन्तरिक श्रोत तथा स्थानिय राजश्वबाट आठ करोड ५६ लाख ८१ हजार,  संघीय र प्रदेश राजश्व बाडफाँटबाट १३ करोड ५० लाख ७२ हजार, संघ र प्रदेश समानिकरण अनुदानबाट १६ करोड ८६ लाख ५० हजार, संघ र प्रदेश सशर्त, समपुरक र विशेष अनुदानबाट ३६ करोड ५९ लाख अनुमान गरिएको छ।

मध्यनेपाल नगरपालिकाको आगामी आर्थिक वर्षका लागि ७१ करोड ८७ लाख ६९ हजार रुपैयाँँ बरावरको बजेट ल्याएको छ। चालु आर्थिक वर्षका लागि ६७ करोड ८८ लाख नौ हजार रुपैयाँँ बरावरको बजेट ल्याएको नगरपालिकाले आगामि वर्षका लागि ५ करोड बढी बजेट ल्याएको हो।

राइनास नगरपालिकाको आगामी आर्थिक वर्षका लागि ५९ करोड ३९ लाख रुपैयाँ प्रस्तावित बजेट पेश गरेको छ।

गाउँपालिकातर्फ मर्स्याङ्दी गाउँपालिकाले आगामी आर्थिक वर्षका ५४ करोड ३९ लाख ४५ हजार नौसय ४२ रुपैयाँ बरावरको बजेट ल्याएको छ। गाउँपालिका अध्यक्ष अर्जुन गुरुङले आगामी आर्थिक वर्षका लागि बजेट प्रस्तुत गरेका हुन्।

जिल्लाको दोर्दी गाउँपालिकाले आगामी आर्थिक वर्षका लागि ५६ करोड ५७ लाख ४६ हजार रुपैयाँ बजेट प्रस्ताव गरेको सूचना अधिकारी धर्म गुरुङले बताए। यस्तै क्व्होलासोँथर गाउँपालिकाले ३५ करोड १८ हजार रुपैयाँ बजेट ल्याएको छ।

आगामी आर्थिक वर्षका लागि प्रस्तुत वजेटमध्ये चालु तर्फ २५ करोड ८४ लाख १० हजार र पुँजीगत तर्फ ९ करोड १६ लाख ८ हजार बजेट विनियोजन गरेको गाउँपालिका अध्यक्ष सुर्य गुरुङले वताए। जिल्लाको दुधपोखरी गाउँपालिकाले ३६ करोड ५१ लाख रुपैयाँ बजेट विनियोजन गरेको छ।