जिल्लाको ईशनाथ नगरपालिकास्थित पोखरीको डिलमा छरपस्ट अवस्थामा बिहीबार प्रहरीले १० लाख १० हजार रुपैयाँ भेट्टाएको छ।

स्थानीय माइस्थान चोक सँगैको पोखरी छेउमा प्रहरीलाई देखेपछि दुई जना भागेका थिए। प्रहरीले मानिस भाग्नुको कारण पत्ता लगाउन जाँदा पैसा छरिएको अवस्थामा फेला परेको ईशनाथ नगरपालिकाका मेयर सन्तोष मेहताले बताए।

तर रकम कसको भन्ने अहिलेसम्म खुलेको छैन। 

'कोभिड १९ को संक्रमण रोक्न जारी लकडाउनको क्रममा गस्तीमा रहेको सुरक्षाकर्मीले बिहान ना ५४ प २११६ नम्बरको मोटरसाइकललाई रोक्न खोजेको थियो। त्यसमा दुईजना सवार थिए। त्यसपछि पोखरी छेउमा मोटरसाइकल छाडेर भागेका थिए',उनले भने।

बरामद भएको रकम हुण्डी कारोबारीको हुन सक्ने औरैयाका प्रहरी सहायक निरीक्षक ललितकुमार साहले बताए। 

बरामद गरिएकाे रकम नगर प्रमुख मेहताको घरमा लगेर गनेका थिए। बरामद रकम र मोटरसाइकल प्रहरी चौकी औरैयामा राखिएको छ।