अष्ट्रेलियाको डार्विनको एक मोटेलमा भएको बन्दुक आक्रमणमा कम्तीमा पनि ४ जना मारिएका छन् भने एकजना घाइते भएका छन्।
स्थानीय समयअनुसार मंगलबार साँझ पौने ७ बजे पाम मोटेलमा आक्रमणकारीले आफ्नो सटगनबाट अन्धाधुन्ध गोली चलाएको थियो ।
प्रहरीले एक घण्टाभित्रै संदिग्ध आक्रमणकारीलाई पक्राउ गरी घटना नियनत्रणमा ल्याइसकेको बताएको छ ।
आक्रमणकारी डार्विनकै ४५ वर्षीष बेन होफम्यान भएको प्रहरीले जनाएको छ। ऊ जनवरीमा मात्र जमानतमा छुटेको थियो। प्रहरीका लागि सुपरिचित उसको खुट्टामा इलेक्ट्रोनिक सेन्सर राखिएको थियो ।
घटनाको कारणबारे अनुसन्धान भैरहेको प्रहरीले जनाएको छ । मारिनेहरूको परिचय भने सार्वजनिक गरिसकिएको छैन ।
अस्ट्रेलियामा सन् १९९६ मा तास्मानियामा भएको गोलीकाण्डमा ३५ जनाको ज्यान गएपछि बन्दुकमाथि नियन्त्रण गर्ने कडा कानुन ल्याइएको थियो। त्यसयता यस्ता घटनाहरू त्यहाँ बिरलै हुने गर्छन् ।
यसैबीच अस्ट्रेलियाका प्रधामन्त्री स्क्ट मरिसनले घटनाको निन्दा गरेका छन् । उनले यसलाई अस्ट्रेलियन नागरिकले गर्नै नसुहाउने कायर काम भनेका छन् ।
