अमेरिकी राष्ट्रपति डोनल्ड ट्रम्पले ट्विटरमार्फत् उत्तर कोरियाली नेता किम जङ-अनलाई उत्तर र दक्षिण कोरियाबीचको सीमामा भेट्न आमन्त्रण गरेका छन्।
जापानमा जी-२० समूहको शिखर सम्मेलनपछि दक्षिण कोरियाको भ्रमणमा आउने पूर्वसन्ध्यामा उनले यस्तो अप्रत्यासित ट्विट गरेका हुन् ।
दुईदिने भ्रमणका क्रममा सोलमा रहँदा राष्ट्रपति ट्रम्पले प्रगति शून्यजस्तै भइरहेको उत्तर कोरियासँगको परमाणुनिरस्त्रीकरण वार्तालाई अघि बढाउने उपायबारे छलफल गर्ने बताइएको छ ।
उनीहरूबीच सिमामा भेट हुन्छ हुदैन, त्यो बेग्लै कुरा हो । तर, ट्रम्पले गरेको यो ट्विटले तरङग ल्याएको छ ।
यसैबीच दक्षिण कोरियाली राष्ट्रपतिको कार्यालयले किमसँगको भेटबारे पुष्टि नभइसकेको जनाउँदै आफूले वार्ता होस् भन्ने चाहेको जनाएको छ ।
सन् २०१७ को नोभेम्बरमा ट्रम्पले दुई कोरियाबीचको असैनिकीकृत क्षेत्र भनिने सीमाको आकस्मिक भ्रमण गर्ने प्रयास गरेका थिए। तर खराब मौसमका कारण उनी त्यो योजना परित्याग गर्न बाध्य भए।
