इंग्लिस प्रिमियर लिग फुटबलमा म्यानचेस्टर युनाइटेडले सहज जित हात पारेको छ।
आइतबार घरेलु मैदानमा भएको खेलमा युनाइटेडले ब्राइटनलाई ३–१ गोल अन्तरको जित हात पारेको हो ।
युनाइटेडलाई जित दिलाउन आन्द्रेस पेरेइरा र मार्कुस राष्फोर्डले एक एक गोल गरे।एक गोल भने उपहार पाएको थियो। यस्तै ब्राइटनका लेविस डुन्कले एक गोल फर्काए ।
ओल्डट्राफोर्डमा खेलको १७ औं मिनेटमा आन्द्रेसले गोल गर्दै युनाइटेडलाई अग्रता दिलाए । १९ औं मिनेटमा ब्राइटनका डेभी प्रोपरले आत्मघाती गोल गरेपछि युनाइटेड पहिलो हाफमा २–० ले अघि रह्यो ।
६४ औं मिनेटमा ब्राइटनका लेविसले गोल गर्दै खेल २–१ मा ल्याए। तर, खेलको ६६ औं मिनेटमा राष्फोर्डले गोल गर्दै युनाइटेडलाई ३–१ को जित दिलाए।
जितसँगै युनाइटेड लिगको सातौं स्थानमा उक्लिएको छ । युनाइटेडले १२ खेलबाट १६ अंक जोडेको छ । पराजित ब्राइटन १५ अंक जोडेर ११ औं स्थानमा रहेको छ ।
