‘जेन—जी’ भनेर चिनिने नयाँ पुस्ताले भदौ २३ गते माइतीघरदेखि संघीय संसद भवन परिसर बानेश्वरसम्म विशाल प्रदर्शनको तयारी गरेको छ।

नयाँ पुस्ताको आन्दोलनमा विभिन्न दल, बुद्धिजिवी र व्यक्तिहरूले समर्थन जनाइरहेका छन्। लगातार प्रतिनिधि सभा बहिष्कार गरिरहेका राप्रपा होस् वा रास्वपा, जेन—जीको विश्वास जित्न उद्यत देखिन्छन्।

मेडिकल व्यवसायी दुर्गा प्रसाईंले पनि आन्दोलनमा साथ दिने वचन दिएका छन्। यस्तोमा विशुद्ध जेन—जी पुस्ताको भनिएको आन्दोलनमा विभिन्न स्वार्थ समूह र अराजक तत्वको घुसपैठ हुनसक्ने आशंका गरिएको छ।

जेन–जी पुस्ताले प्रसाईंको सामाजिक सञ्जालमै पुगेर असन्तुष्टि व्यक्त गरेका छन्। उनीहरूले आफूहरूको शान्तिपूर्ण आन्दोलनमा प्रसाईंको समूहलाई सहभागी नहुन आग्रह गरेका छन्।

जेन–जी पुस्ताले आफूहरूको आन्दोलनमा सबैको समर्थन र ऐक्यवद्धताको आह्वान गरे पनि शान्तिपूर्ण आन्दोलनमा घुसपैठ नगर्न र सकेसम्म जेन-जी पुस्ता मात्रै सहभागी हुन आग्रह गरिएको छ।

कुनै पनि नेतृत्वविना युवाको स्वतःस्फूर्त सहभागीता रहने प्रदर्शनलाई स्वार्थको रोटी सेक्नेहरूले ‘हाइज्याक’ गर्न सक्ने चिन्ता व्यक्त गरिएको छ।

राप्रपासहित राजावादी, रास्वपा, दुर्गा प्रसाईंजस्ता दल वा समूहले जेन—जीको विश्वास जित्न अनेक हत्कण्डा गर्दैछन्। यता नयाँ पुस्ता भने स्वतःस्फूर्त आन्दोलनमा घुसपैठको चिन्तामा छन्।

राजनीतिमा जेन—जीको ‘हस्तक्षेप’

भोलि ९ बजे माइतीघरदेखि नयाँ बानेश्वर चोकसम्म नयाँ पुस्ताले प्रदर्शनका लागि आव्हान गरेको छ। यो कुनै राजनीतिक दल वा दलनिकट व्यक्तिहरूको प्रदर्शन होइन, यो त इन्टरनेटको लयमै हुर्किरहेका ‘जेन—जी’हरूको विद्रोह हो।

देशमा मौलाइरहेको ‘भ्रष्टाचार, बेथिति र तानाशाही’ प्रवृत्तिविरूद्ध नेपाली नयाँ पुस्ताले थालेको यो विद्रोहको सुरुवात सोमबार काठमाडौंबाट हुनेछ।

सामाजिक सञ्जालमार्फत फैलिएको विद्रोहको यो झिल्लो अब भने सडकमै सल्किनेछ। त्यसका लागि नयाँ पुस्ताले देशैभरि आह्वान गरिसकेका छन्— ‘अब सामाजिक सञ्जालमा लाइक, कमेन्ट गरेर बस्ने होइन, सडकमा उत्रिनुको विकल्प छैन।’

खासगरी, पछिल्लो समय इन्डोनेसियादेखि फिलिपिन्स हुँदै नेपालतर्फ बगिरहेको ‘नेपो बेबी’ अभियानमार्फत युवा—पुस्ताले ‘भ्रष्ट राजनीतिज्ञ र उच्चपदस्थ व्यक्ति’का बिलासी सन्तान (छोराछोरी र नातिनातिना)हरूलाई ‘टिकटक, रेडिट र इन्स्टाग्राम’मा हिर्काइरहेको छ। प्रश्नको घेरामा ल्याएको छ।

‘नेपो बेबी’ अर्थात विना अनुभव तर पारिवारिक वा राजनीतिक हैसियतकै आधारमा अवसरमा हालिमुहाली र लाभ लिने सन्तानहरू, जसको नाममा थुप्रिन्छ अर्बौंको सम्पत्ति र जिउँछन् आलिसान जीवनशैली।

सन् २०२३ मा इन्डोनेसियामा राष्ट्रपति जोको ‘जोकोवी’ विडोडोका छोरा गिब्रान राकाबुमिङ राकालाई बाबुको छत्रछायाँमा अनुभव बिना उपराष्ट्रपति पदको उम्मेदवार बनाइएपछि ‘नेपो बेबी’को ट्रेन्ड चल्यो।

फिलिपिन्समा बाढी नियन्त्रण प्रोजेक्ट फेल भएपछि ठेकेदार र नेताका सन्तानका बिलासी जीवनशैली ‘एक्सपोज’ अभियान थालियो। जसले विद्रोहकै रुप लियो। जुन अभियान नेपालमा प्रवेश गरेको छ। ‘जेन—जी’ पुस्ताको आक्रोश सडकमै देखिदैछ।

एकातिर नागरिकमा लादिएको चर्को कर, अर्कोतिर त्यही करको दुरुपयोग र विना आम्दानी स्रोत ‘नेपो किड्स’का देश विदेशमा ऐसआरामको जीवन, यही हो संघर्षरत जेन—जीलाई घोचेको विषय।

‘नेपो बेबी’ अभियान सामाजिक सञ्जालमा मात्रै सीमित छैन, यसले अहिले शान्तिपूर्ण र अर्थपूर्ण आन्दोलनको आकार लिँदैछ।

अभियानमा संलग्न युवाहरूले भदौ २३ गते अर्थात् सोमबार ९ बजे माइतीघरदेखि नयाँ बानेश्वर चोकसम्म प्रदर्शनका लागि आव्हान गरेको छ। यो कुनै राजनीतिक दल वा दलनिकट व्यक्तिहरूको प्रदर्शन होइन, यो त इन्टरनेटको लयमै हुर्किरहेका ‘जेन—जी’हरूको विद्रोह हो।

सामाजिक सञ्जालमा सक्रिय नयाँ पुस्ताले संस्थागत रुपमै मौलाइरहेको भ्रष्टाचार र दशकौंदेखि राज्यसत्ता हाँकिरहेका नाइकेहरूसँग हिसाबकिताब माग्दैछ।

‘नेपो बेबी’ ट्रेन्ड मनोरञ्जनका लागि मात्र सीमित छैन। यसले भिडियोमार्फत् जनताका छोराछोरीहरूले भोगिरहेका दुःख, अभाव र परदेशमा बगाएको पसिनाको सस्तो मूल्य देखाएको छ। अर्कोतर्फ ‘जेन—जी’ र ‘अल्फा’ पुस्ताले सत्ता र शक्तिको आडमा मोटाइरहेका व्यक्ति र तीनका छोराछोरीहरूलाई प्रश्नमाथि प्रश्न थप्दैछ।

नवपुस्ताको मौनता अब— भ्रष्ट नेता, कर छल्ने व्यापारी वा बिचौलिया कर्मचारीमा मात्रै सीमित रहेन।

यसले त अहिले राजनीतिमा फैलिएको ‘वंशवाद’ र बिलासी जीवनशैली बिताइरहेका ‘नेपोटिज्म बेबी’ अर्थात् नेताका छोराछोरीहरूको घिनलाग्दो पोल पनि खोल्दैछ। ‘जेन—जी’को गम्भीर प्रश्न छ, ‘हामीहरू धौधौ बाँच्नका लागि सघर्ष गरिरहेका छौं तर नेताका छोराछोराहरूसँग कसरी लक्जरी गाडी, महँगो विदेश यात्रा र ब्रान्डेड सामानको थुप्रो छ?’

‘हाम्रो रगत र पसिना बेचेर राज्यलाई तिरेको करबाट अब तिमीहरू मोज—मस्ती गर्न पाउँदैनौ। सामान्य मानिसले त्यही मौका पाउन संघर्ष गर्नुपर्छ, तर शक्तिशाली परिवारका सन्तानले सजिलै पाउँछन् हरेक अवसर’— यही हो ‘जेन—जी’को प्रश्न।

‘आक्रोश, निराशा र परिवर्तनको तीव्र चाहना राखेको’ नयाँ पुस्ता नै ‘जेन—जी’ हो, अब यसले राजनीतिमा पनि हस्तक्षेप गर्दैछ।

गरिब र निमुखा नेपाली जनताले भोग्दै आएको ‘असमान लोकतन्त्र’को परिभाषा बदल्दैछ। र, ‘लूटतन्त्र’लाई खबरदारी गर्दैछ।