एमाले अध्यक्ष एवं प्रधानमन्त्री केपी शर्मा ओलीले आफ्नै लागि पार्टीको विघान संशोधन गरिएको स्पष्ट पारेका छन्।

बुधबार साँझ काठमाडौं उपत्यकाका केन्द्रीय सदस्यसहित बागमती प्रदेशका नेता र विधान महाधिवेशन प्रतिनिधिलाई बालुवाटार बोलाएर प्रशिक्षण दिने क्रममा सो कुरा स्पष्ट पारेका हुन्।

काठमाडौं जिल्ला कमिटी अध्यक्ष दीपक निरौलाले बुधबार राति ओलीको भनाइ र निर्देशनको फेहरिस्त ४८ बुँदामा सार्वजनिक गरेका थिए।

निरौलाले सार्वजनिक गरेअनुसार ‌ओलीले आफ्नो लागि विधान संशोधन गरिएको स्पष्ट पारेका थिए।

ओलीले भने, ‘ साथीहरूको आम चाहाना, समयको माग र म स्वस्थ रहेको हुँदा दुई कार्यकाल र ७० वर्षे उमेरहद आवश्यक रहेन।’

सो क्रममा ओलीले पार्टीमा विद्या भण्डारी, ईश्वर पोखरेलदेखि पार्टी बाहिर राप्रपा अध्यक्ष राजेन्द्र लिङदेन र रवि लामिछानेसम्मको उछितो काढे। र, नेताहरूलाई आफ्नो र पार्टीको निर्णयको पक्षमा उभिन निर्देशन दिए।