सिमा विवादलाई लिएर गत बिहीबारदेखि थाइल्याण्ड र कम्बोडियाका सैनिक आपसमा भिडिरहेका छन्। यो लडाईंमा अहिलेसम्म २७ जनाभन्दा धेरै मानिस मारिइसकेका छन्। 

अहिले पनि दुबैतर्फका सैनिकहरूले हवाई तथा जमिनी आक्रमण गरिरहेका छन्। 

लाखौं मानिसले आफ्नो थातथलो छोडेर शरणार्थी भएको सञ्चार माध्यमहरूले जनाएका छन्। 

यो बीचमा कम्बोडियाले संयुक्त राष्ट्रसंघलाई गुहारेको छ। उसले बिनाशर्त युद्ध रोक्नका लागि थाइल्याण्डलाई अनुरोध गर्न पनि राष्ट्रसंघसँग अपिल गरेको छ। कम्बोडिया आफूले स्थायीरुपमा शान्तिको चाहना राखेको भन्दै थप युद्ध गर्न नचाहेको प्रस्ट पारेको छ। तर त्यसका लागि बिनाशर्त युद्ध बिराम हुनुपर्ने उसको माग छ। 

यसअघि थाइल्याण्डले सिमा क्षेत्रका ८ जिल्लामा ‘मार्शल ल’ लागु गरिसकेको छ। दुबै देशका सैनिकले एकअर्कामाथि पहिला गोली प्रहार भएको बताएका छन्। 

बिहीबारको झडपपछि थाइल्याण्डका कार्यवाहक प्रधानमन्त्री फुमथाम वेचायाचाईले कम्बोडियासँग युद्ध हुनेसक्ने बताएका थिए।

सीमा क्षेत्रमा सुरु भएको झडप बढिरहेको बेला उनले कम्बोडियासँग युद्ध हुनेसक्ने बताएका हुन्।

‘यदि अवस्था झन् चर्कियो भने यो युद्धमा परिणत हुनसक्छ, यद्यपि अहिलेसम्म यो झडपमै सीमित छ’, उनले भनेका छन्, ‘यस्ता झडपले जनताको जीवन प्रभावित पारेको छ र सरकारले हाम्रो राष्ट्र र सर्वाभौमसत्ताको रक्षा गरेको छ।’