नेपाल राष्ट्र बैंकको गभर्नरमा कांग्रेस निकट डा. विश्व पौडेल पक्का भएका छन्।

मंगलबार प्रधानमन्त्री केपी शर्मा ओली र कांग्रेस सभापति शेरबहादुर देउवाबीच भएको छलफलमा पौडेललाई नै गभर्नर बनाउने सहमति जुटेको विश्वस्त स्रोतले बतायो।

सत्तारुढ दल कांग्रेस-एमालेबीच नै कुरा नमिल्ला लामो समयदेखि गभर्नर सिफारिसको विषय पेचिलो बनिरहेको थियो। ओली-देउवाबीचको निर्णायक छलफलपछि गभर्नरमा पौडेलको नाम फाइनल भएको हो।

प्रधानमन्त्री ओलीले गभर्नर नियुक्तिका लागि मंगलबार साँझ ५ बजेका लागि मन्त्रिपरिषद बैठक आह्वान गरेका छन्।

त्यस्तै अर्थमन्त्री गभर्नर सिफारिस समितिका संयोजक रहेका अर्थमन्त्री विष्णु पौडेलले पनि समितिको बैठक आह्वान गरिसकेका छन्। समितिको बैठक आजै अपराह्न बस्दै छ। समितिले राष्ट्र बैंकको सम्भावित गभर्नरमा तीनजनाको नाम सिफारिस गर्ने छ।

समितिले सिफारिस गर्ने बित्तिकै मन्त्रिपरिषद बैठक बस्नेछ। समितिले सिफारिस गरेका तीनजनामध्येबाट मन्त्रिपरिषदले एकजनालाई गभर्नरमा नियुक्त गर्नेछ। तर, यी सबै औपचारिक प्रक्रिया पूरा गर्नका लागि मात्रै हुनेछ।