जिल्ला कारागार मोरङमा पुर्पक्षका लागि थुनामा रहेका एक थुनुवाको मृत्यु भएको छ।

मृत्यु हुनेमा रामेछापको दोरम्बा सैलुङ गाउँपालिका-२ का ५४ वर्षीय प्रवीण तामाङ रहेका कारागारका जेलर गौरव ढुंगेलले बताए। उनको आइतबार बिहान विराटनगरस्थित कोशी अस्पतालमा उपचारका क्रममा मृत्यु भएको हो।

ठगी मुद्दामा थुनामा रहेका तामाङलाई श्वासप्रश्वासमा समस्या आएपछि शनिबार साँझ अस्पताल भर्ना गरिएको थियो। उपचारकै क्रममा आइतबार बिहान ४ बजे तामाङको ज्यान गएको ढुंगेलले जानकारी दिए।

तामाङ २०८१ पुस १६ गते अदालतको आदेशअनुसार पुर्पक्षका लागि कारागार चलान भएका थिए। उनको ठगीसम्बन्धी मुद्दा अझै अदालतमा विचाराधीन अवस्थामा छ।

तामाङको शव कोशी अस्पतालमै राखिएको छ। परिवारलाई सूचना दिइएको र उनीहरू आइपुगेपछि थप प्रक्रिया अघि बढाइने कारागार प्रशासनले जनाएको छ।

३ सय जनाको क्षमता भएको मोरङ कारागारमा हाल १ हजार ३८ जना कैदीबन्दी राखिएका छन्।