पूर्व प्रधानमन्त्री बाबुराम भट्टराईको नेपाल समाजवादी पार्टी (नयाँ शक्ति)को महाधिवेशन आइतबारबाट सुरु भएको छ।

महाधिवेशनको उदघाटन सत्रमा बाबुरामले पुराना दलहरूलाई बहिष्कार गरेका छन्। एमाले, कांग्रेस, माओवादी केन्द्र, राप्रपालगायत दलका नेताहरूलाई निम्तो गरिएको छैन। नयाँ र वैकल्पिक पार्टीका नेताहरूलाई मात्र निम्तो दिइएको छ।

उदघाटन सत्रमा राष्ट्रिय स्वतन्त्र पार्टी (रास्वपा) का कार्यबाहक सभापति डोल प्रसाद अर्याल, जनमत पार्टीका अध्यक्ष सीके राउत, नागरिक उन्मुक्ति पार्टीका संरक्षक रेशम चौधरी, विवेकशील साझाकी नेतृ समीक्षा बाँस्कोटालगायत नेताहरू सहभागी भएका छन्।

काठमाडौंस्थित प्रज्ञा-प्रतिष्ठानमा आइतबारबाट सुरु भएको महाधिवेशन माघ २९ गतेसम्म चल्ने बताइएको छ।

एक हजार पाँच सय प्रतिनिधि सहभागी महाअधिवेशनमार्फत ११ जना पदाधिकारीसहित ९९ सदस्यीय केन्द्रीय समिति चयन गरिने पार्टीले जानकारी दिएको छ।