राष्ट्रिय स्वतन्त्र पार्टी (रास्वपा)का सभापति तथा उपप्रधान एवम् गृहमन्त्री रवि लामिछानेले आफूले जेलको उद्घाटन गरेको र कुनै दिन सबै मिलेर आफूलाई त्यहीँ जेलमा हाल्न सक्ने शंका ब्यक्त गरेका छन्। 

शुक्रबार संसदमा प्रधानमन्त्रीले मागेको विश्वासको मतमाथि छलफलमा सहभागी हुँदै उनले भने– ‘कुनै दिन राम्रो काम गर्न सकिएछ र साथ मिलेछ भने भ्रष्टहरूलाई जेल हाल्छु। सकिनछु भने तिनीहरूले मलाई जेलमा हाल्नेछन्।’

तीन महिने गृहमन्त्रीको कार्यकालमा उद्घाटनमा आफूले समय नदिएको भन्दै उनले नेपालगन्जमा एउटा जेल भने उद्घाटन गरेको बताए। ‘३ महिने कार्यकालमा उद्घाटनमा समय दिएन। आवश्यक ठानिन तर मैले एउटा उद्घाटन गरें। त्यो हो नेपालगन्जको एउटा जेल। त्यहाँ मेरो नाममा शिलालेख लेखिएको छ।’

जेलको उद्घाटनको सन्दर्भ जोड्दै लामिछानेले आफूलाई कुनै दिन भ्रष्टहरूले मिलेर जेल हाल्ने शंका ब्यक्त गरेका हुन्।  

यस्तै उनले अगाडि भने– ‘अब त मलाई ठग प्रमाणित गर्न तपाईंलाई कुनै कठिन पर्दैन होला। कोही न त कोही जेल जानु नै पर्छ। सुरु म बाट गर्नुस्। तर सत्यबाट बिमुख हुने छैन।’