नेपाली कांग्रेसले आगामी असोज १६ गतेबाट गर्ने भनेको १५औं महाधिवेशनको मिति हेरफेर गर्ने भएको छ।

नेता शेखर कोइरालासँगको छलफलपछि सभापति गगन थापा महाधिवेशनको मिति सार्न सकारात्मक भएका उनीनिकट स्रोतले बतायो। आइतबार मध्याह्न दुई नेताबीच भेटवार्ता भएको थियो।

आजको केन्द्रीय कार्यसम्पादन समितिको बैठकले वडा अधिवेशन करिब हप्ता सारेर असोज २ गतेबाट सुरु गर्ने निर्णय गर्न लागेको बैठकमा सहभागी एक पदाधिकारीले बताए।

उनका अनुसार वडा अधिवेशन सरेपछि अन्य तहको अधिवेशनसँगै केन्द्रीय महाधिवेशनको कार्यतालिका पनि हेरफेर हुनेछ। पूर्वघोषित कार्यतालिका अनुसार भदौ २४ गतेबाट वडा अधिवेशन गर्ने तयारी गरिएको थियो।

गगन थापासँगको भेटमा नेता कोइरालाले देश, लोकतन्त्र र राष्ट्रियता अप्ठ्यारो अवस्थामा पुगेकाले कांग्रेस एकढिक्का हुनुको विकल्प नरहेको भन्दै त्यसका लागि जस्तोसुकै त्याग गर्न पनि आफू तयार रहेको बताएका थिए।