चिलिमे जलविद्युत् आयोजनामा सुरुङभित्र फसेकाहरूको उद्धारका लागि नेपाली सेना र भारतीय सेनाको संयुक्त टोलीले प्रयास जारी राखेको छ।

शनिबार दिउँसोसम्म २५० मिटर सुरुङमध्ये १०० मिटर सुरुङमा माटो र भग्नावशेष हटाउने काम भएको नेपाली सेनाले जनाएको छ।

सुरुङ उद्धारमा हाल नेपाली सेना र भारतीय सेनाका २१ जना जनशक्ति अवरत खटिएका छन्। तर, भौगोलिक विकटता, प्रतिकूल मौसम र सडक सञ्जाल पूर्ण रूपमा विच्छेद हुँदा उद्धारका लागि आवश्यक जनशक्ति, सामग्री तथा उपकरण घटनास्थलसम्म पुर्‍याउन कठिनाइ भइरहेको छ।

म्यानुअल रुपमा सुरुङ खन्न कठिन भएपछि ठूलो एक्साभेटर पठाउने प्रयास थालिएको छ। जसका लागि स्याफ्रुबेँसीदेखि पावरहाउस पोर्टलसम्म पहुँच सडक निर्माणको काम शनिबारदेखि सुरु गरिएको छ।

नेपाली सेनाका अनुसार घटनास्थलमा ठूला हेलिकप्टर अवतरण गर्नसक्ने अवस्थासमेत नभएकोले साना हेलिकप्टरबाट उद्धार सामग्रीहरू प्रयास भइरहेको छ।