नेपाली कांग्रेसका नेता एवं इतर पक्षको राष्ट्रिय भेलाका संयोजक डा. शशांक कोइरालाले कांग्रेस सभापतिमा दाबी गरेका छन्।

शनिबार काठमाडौंमा आयोजित संस्थापन इतर पक्षको राष्ट्रिय भेलालाई सम्बोधन गर्दै आफू पार्टी विभाजन वा नयाँ दल खोल्ने पक्षमा नरहेको बताएका हुन्। 

उनले जनताको चाहनाअनुसार पार्टीलाई समयसापेक्ष परिमार्जन गर्दै लैजानुपर्नेमा जोड दिए। नेता कोइरालाले पार्टीभित्र हुनसक्ने सम्भावित विवादलाई संवादका माध्यमबाट समाधान गर्न सकिने विश्वास व्यक्त गरे।

आगामी १५ औं महाधिवेशनमा सभापतिका लागि आफू इच्छुक रहेको उनले बताए। यद्यपि डा. शेखर कोइरालाले दाबी गरेमा आफू उनलाई सघाउन तयार रहेको उनले बताए।

‘सभापति पदका लागि म इच्छुक छु तर मेरो इच्छाले मात्र हुँदैन। साथीहरूसँग परामर्श गरेर उहाँहरूको सुझावअनुसार म निर्णय गर्नेछु। नयाँ र संगठित कांग्रेसका लागि अबको मूल केन्द्रबिन्दु विकास हुनुपर्छ। नीति राम्रो भयो भने मात्र जनता आकर्षित हुन्छन्, त्यसैले हाम्रो ध्यान अब ठोस नीति र विकासमा हुनुपर्छ,’ उनले भने।