नेकपा एमालेका अध्यक्ष एवं पूर्वप्रधानमन्त्री केपी शर्मा ‌ओलीले आफूहरूलाई कमजोर नठान्न सरकारलाई चेतावनी दिएका छन्।

नेपालको कम्युनिस्ट आन्दोलन र जननेता मदन भण्डारी विषयक विचार गोष्ठीलाई सम्बोधन गर्दै ओलीले देशविरुद्ध सल्बलाएका प्रतिक्रियावादी शक्तिहरूलाई परास्त गर्ने बताए।

‘हामी मरेका छैनौं, फेरि उठ्छौं र प्रतिक्रियावादीहरूलाई परास्त गर्छौं। धुलो टक्टक्याउँदै उठ्छौं। अग्रगामी परिवर्तनतर्फ अघि बढ्छौं,’ ओलीले भने।

उनले संसद विघटनलाई असंवैधानिक करार गर्दै एमालेले चुनावमा नजाने अडान लिए पनि अन्य दलले साथ नदिएको गुनासो गरे।

‘हामीले यो चुनाव रोकौं भन्दा सबैले एमालेका लागि भिर हो, हामीलाई हाइवे हो भन्ने ठाने साथीहरूले। यो चुनाव बामपन्थी र लोकतान्त्रिकहरूका लागि थिएन। पहिले नै परिणाम तय थियो। अहिले पनि प्रतिगमनको सिलसिला जारी रहेको छ।’