पूर्वअर्थमन्त्री तथा नेकपा एमालेका उपाध्यक्ष विष्णु पौडेललाई गैरकानूनी ढंगले थुनामा राखिएको भन्दै पौडेल पत्नी दोमाया पौडेल सर्वोच्च अदालत पुगेकी छन्।

बुधबार पौडेल पत्नीले श्रीमानलाई राजनीतिक प्रतिशोध राखेर बिना कुनै प्रमाण र आधारमा पक्राउ गरिएकाले रिहाइको आदेश गर्न माग गर्दै सर्वोच्चमा बन्दी प्रत्यक्षीकरणको रिट दायर गरेकी हुन्।

पौडेलले विशेष अदालत, प्रधानमन्त्री तथा मन्त्रिपरिषद् कार्यालय, गृह मन्त्रालय, सम्पत्ति शुद्धीकरण अनुसन्धान विभाग र सुर्खेत प्रहरीलाई विपक्षी बनाएर रिट निवेदन दिएकी हुन्।

निवेदनमाथि बिहीबार सर्वोच्च अदालतमा प्रारम्भिक सुनुवाइ हुनेछ। सम्पत्ति शुद्धीकरण अनुसन्धान विभागले बिचौलिया दीपक भट्ट र विवादित व्यवसायी कमलकिशोर मालपानीसँग शंकास्पद कारोबार देखिएपछि पौडेललाई सोमबार सुर्खेतमा पक्राउ गरेर मंगलबार काठमाडौं ल्याएको थियो।

मंगलबार नै विशेष अदालतले उनलाई ७ दिन थुनामा राख्न अनुमति दिएको थियो।