नेपाली कांग्रेसका प्रमुख सचेतक निश्कल राईले चिया पसलमा गएर चिया पिउने प्रधानमन्त्रीले चिया उद्योग र किसानका समस्याप्रति गम्भीर चासो नदेखाएको आरोप लगाएका छन्।

बुधबारको प्रतिनिधिसभा बैठकमा बोल्दै राईले भारतले चिया नकिनेपछि चिया उद्योगहरू भएको प्रसंग उठाउँदै इलामसहित पूर्वी पहाडी जिल्लाका चिया उद्योग र किसानहरू गम्भीर संकटमा परेको भए पनि सरकारले आवश्यक पहल नगरेको दाबी गरे।

उनले भने, ‘मैले योसँग सातौँ पल्ट भयो कुरा उठाएको। प्रधानमन्त्री मन्त्रीहरूलाई लिएर देश बनाउँदै हुनुहुन्छ। सामाजिक सञ्जालमा हेरेर थाहा पाएको, उहाँ चिया पसलमा गएर चिया पिउन पनि भ्याउनुहुन्छ। तर वार्षिक ३ करोड बढी तयारी चिया निर्यात हुने र अर्थतन्त्रको मेरुदण्डको रूपमा रहेको चिया उद्योगी र किसानको समस्या समाधान गर्न उहाँले फुर्सद पाएको देखेको छैन।’