राप्रपा परित्याग गरी दुर्गा प्रसाईंसँग मिलेर नयाँ पार्टी गठनको तयारी गरिरहेका डा. धवल शमशेर राणाले वर्तमान सरकार धेरै नटिक्ने ठोकुवा गरेका छन्।

आइतबार काठमाडौंमा आयोजित राष्ट्रवादी पार्टी निर्माणार्थ जिम्मेवारी हस्तान्तरण तथा परिचयात्मक कार्यक्रममा बोल्दै नेता राणाले बालेन शाह नेतृत्वको वर्तमान सरकारले धेरै गल्ती गरेकाले नयाँ विकल्पको रुपमा आफूहरूले नयाँ पार्टी खोल्न लागेको दाबी समेत गरे।

नयाँ पार्टीले राजासहितको प्रजातन्त्र बोक्ने र मुलुकलाई हिन्दु राष्ट्र कायम गराउने गरी वर्तमान सरकारको विकल्प दिने उनले बताए।

उनले भने, ‘यो बालेन सरकार पनि के होला, कसो होला? भन्ने यो सय दिन नपुग्दै तमाम प्रश्न चिह्नहरू उठिसके। तमाम गल्तीहरू गरिसके। यो बालेन सरकार देशमा असफल भयो भने नेपाली जनताले एउटा विकल्प खोज्नेछन्। त्यो विकल्प भनेको एमाले, कांग्रेस, माओवादी र राप्रपा पनि होइन। त्यो विकल्प भनेको राजासहितको प्रजातन्त्र बोक्ने पार्टी, हिन्दुराष्ट्र ल्याउने पार्टीं त्यो विकल्प हुनेछ। त्यो विकल्प हाम्रो पार्टीले दिनेछ। हाम्रो नयाँ बन्ने पार्टीले दिनेछ।’