राष्ट्रिय स्वतन्त्र पार्टी (रास्वपा) का सभापति रवि लामिछानेले बोलाएको सर्वदलीय बैठक सिंहदरबारमा बसिरहेको छ।

प्रधानमन्त्री बालेन्द्र शाहको तर्फबाट परराष्ट्रमन्त्री शिशिर खनालले जवाफ दिएर सदनको अवरोध खुलाउनेबारे छलफल भइरहेको बताइएको छ।

छलफलमा नेपाली कांग्रेसका भीष्मराज आङ्देम्बे, नेकपा एमालेका रामबहादुर थापा, नेपाली कम्युनिस्ट पार्टीका वर्षमान पुन लगायत सदनमा प्रतिनिधित्व गर्ने सबै दलका नेता र प्रमुख सचेतकहरू सहभागी छन्।

प्रधानमन्त्रीको सीमा विवादसम्बन्धी अभिव्यक्तिलाई लिएर विपक्षीहरूले लगातार सदनमा अवरोध गर्दै आएका छन्। आजको छलफलमा प्रधानमन्त्रीको तर्फबाट परराष्ट्रमन्त्रीले जवाफ दिएर सदन खुलाउने विषयले प्रवेश पाएको हो।

विपक्षीहरूले प्रधानमन्त्रीको लिखित वक्तव्य आए मात्रै सदन चल्न दिने अडान लिएका छन्। यता सभापति लामिछानेले भने प्रधानमन्त्रीको लिखित पत्र नआउने, प्रधानमन्त्रीको तर्फबाट परराष्ट्रमन्त्री शिशिर खनालले जवाफ दिने दोहोर्‍याएका छन्।