राष्ट्रिय स्वतन्त्र पार्टी (रास्वपा)का सभापति रवि लामिछानेले आह्वान गरेको सर्वदलीय बैठकमा विपक्षी दलका नेताहरूले प्रधानमन्त्री बालेन्द्र शाहले संसदको रोस्टममा उभिएर माफी माग्नुपर्ने माग गरेका छन्।

सोमबार सिंहदरबारस्थित सार्वजनिक लेखा समितिको हल बसेको बैठकमा प्रधानमन्त्रीले माफी माग्नुपर्ने मागमा विपक्षी दलका नेताहरू एकमत देखिएको बैठकमा सहभागी एक नेताले बताए।

‘प्रधानमन्त्रीले जुन रोस्टममा उभिएर देशको भौगोलिक अखण्डतामा आँच पुग्ने जुन अभिव्यक्ति दिनुभयो त्यही रोस्टममा उभिएर उहाँले सार्वभौम जनतासँग माफी माग्नुपर्छ भन्ने हाम्रो लाइन रह्यो। रास्वपाका सभापतिले पनि अनौपचारिक रुपमा स्वीकार गरेको संकेत गर्नुभयो। तर, हामीले स्पष्ट जवाफ माग्यौं। प्रधानमन्त्रीले माफी नमागेसम्म संसद बैठक चल्न दिदैनौं भन्ने हाम्रो बटमलाइन रह्यो,’ ती नेताले भने।

बैठकमा नेपाली कांग्रेस, संसदीय दलका नेता भीष्मराज आङ्देम्बे, राप्रपाका अध्यक्ष राजेन्द्र लिङ्देन, नेकपाका सहसंयोजक माधवकुमार नेपाल र नेता वर्षमान पुन, एमालेका सचेतक ऐनबहादुर महरलगायतका नेताहरू सहभागी थिए।

बैठकमा संसदमा देखिएको गतिरोध, समसामयिक राजनीतिक विषय तथा राष्ट्रिय चासोका मुद्धामाथि छलफल भएको बताइएको छ।