परराष्ट्रमन्त्री शिशिर खनाल भारत भ्रमणमा जाने भएका छन्।

जेठ १८ गते भारतीय प्रधानमन्त्री नरेन्द्र मोदी समेत सहभागी हुने एक अन्तरसरकारी अन्तर्राष्ट्रिय सम्मेलनमा भाग लिन परराष्ट्रमन्त्री नयाँदिल्ली जान लागेका हुन्।

परराष्ट्रमन्त्री खनाल जेठ १९ र २० गतेसम्म चल्ने बाघ, चितुवा लगायतका वन्यजन्तु संरक्षणसम्बन्धी अन्तर्राष्ट्रिय समूह ‘बिग क्याट अलायन्स’को सम्मेलनमा भाग लिन भारत जान लागेका हुन्। उनी जेठ २१ गते फर्कने छन्।

भारतीय प्रधानमन्त्री मोदीसँग सम्मेलन स्थलमै खनालको संक्षिप्त कुराकानी गर्ने प्रयास गर्ने परराष्ट्र मन्त्रालय स्रोतले बतायो।

परराष्ट्रमन्त्री खनालले भारतीय समकक्षी एस जयशंकर र वाणिज्यमन्त्री पियूष गोयलसँग ‘साइडलाइन’ वार्ता गर्ने तयारी भइरहेको र सोका लागि अनौपचारिक छलफल भइरहेको परराष्ट्र स्रोतले बतायो। 

स्रोतका अनुसार छलफलका एजेन्डाको तयारी भइरहेको छ। परराष्ट्रमन्त्रीले भारतीय समकक्षीलाई नेपाल भ्रमणको निम्तो दिनेछन्। जयशंकर नेपाल आएपछि प्रधानमन्त्री बालेनको भारत भ्रमणको मिति तय गर्ने तयारी छ।