नेपाली कांग्रेससहित साना दलहरू नेकपा एमाले र नेपाली कम्युनिस्ट पार्टीले एक/एक संसदीय समिति सभापतिमा उम्मेदवारी दिएका छन्।

बिहीबार बसेको साना दलहरूको बैठकले विपक्षीहरूबीच सभापति निर्वाचनमा मोर्चाबन्दी गर्नेबारे सहमति भएको थियो। सोही सहमतिअनुसार कांग्रेसका भरतबहादुर खड्काले प्रतिनिधिसभा अन्तर्गतको सार्वजनिक लेखा समिति सभापतिमा उम्मेदवारी दिएका छन्।

यो पदमा भने संसदको सबैभन्दा ठूलो दल राष्ट्रिय स्वतन्त्र पार्टी (रास्वपा)ले विपक्षीलाई दिने अभ्यासअनुसार प्रमुख प्रतिपक्षी दल नेपाली कांग्रेसलाई दिने निर्णय गरिसकेको छ।

त्यस्तै नेकपा एमालेका गुरुप्रसाद बरालले प्रतिनिधि सभा अन्तर्गतको शिक्षा, स्वास्थ्य तथा सूचना प्रविधि समितिको सभापतिमा उम्मेदवारी दिएका छन्। यो पदमा रास्वपाका तर्फबाट डा. ओजस्वी शेरचन उम्मेदवार छन्। जसमा बहुमत रहेको रास्वपाको अगाडि एमालेजस्तो सानो दलका उम्मेदवारले जित्ने सम्भावना छैन।

यस्तै, संघीय संसद्को संयुक्त समिति अर्थात् राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समिति सभापतिमा नेकपाकी मदनकुमारी शाह (गरिमा)को उम्मेदवारी परेको छ। 

यो समिति सभापतिमा रास्वपाका तर्फबाट गणेश कार्कीको उम्मेदवारी परेको छ। यसमा पनि नेकपाले सभापति पाउने सम्भावना छैन।