श्रम, रोजगार तथा सामाजिक सुरक्षामन्त्री दीपककुमार साहलाई पदबाट हटाउन रास्वपाकाे केन्द्रीय अनुशासन आयोगले प्रधानमन्त्री वालेन्द्र शाहलाई आग्रह गरेकाे छ।

१३ चैतमा मन्त्री नियुक्त महोत्तरी–२ बाट निर्वाचित उनी श्रीमती जुनु श्रेष्ठलाई स्वास्थ्य बीमा बोर्डमा सदस्य नियुक्त गरेपछि विवादमा तानिएका हुन्।

आयोगकाे आग्रहपछि प्रधानमन्त्री शाहले श्रममन्त्री हटाउने तयारी थालिसकेका छन्। सभापति रवि लामिछानेनिकट स्रोतका अनुसार दीपककुमार साहका गतिविधि मन्त्रालयको स्वार्थसँग बाझिने खालको रहेको पाइएको छ।

‘श्रम, रोजगार तथा सामाजिक सुरक्षा मन्त्री माननीय दीपककुमार साहले मन्त्रीमा बहाल रहँदा पदीय मर्यादाको दुरुपयोग गरी श्रीमतीलाई लामो समय देखि निष्क्रिय राखिएको स्वास्थ्य बिमा बोर्डको सदस्यमा नियमित गराउने कार्य गरेको व्यहोरा पार्टीको केन्द्रीय अनुशासन आयोगको अध्ययनबाट देखिएको र आयोगबाट आवश्यक कारवाहीको लागि मिति २०८२ चैत्र २५ गते पत्र प्राप्त भएको जानकारी गराउँदछु। यसबाट पार्टीको छवि, आदर्श, सिद्धान्त र मर्यादामाथि आँच आउने देखिएको छ,’ सभापति लामिछानेले भनेका छन्। 

केही वर्षअघि पनि उनी रकम लेनदेन विवादमा प्रहरी हिरासतमा पुगेका थिए।