पर्साको विरगन्ज महानगरपालिकामा–१ मा ११ वर्षीया बालिकामाथि यौनजन्य हिंसाको प्रयास गर्ने एक पुरुषलाई प्रहरीले पक्राउ गरेको छ।

वीरगन्ज–८ दुर्गा रोडमा किराना र मासु पसल सञ्चालन गर्ने छपकैया निवासी ५० वर्षीय इस्माइल मियालाई प्रहरीले नियन्त्रणमा लिएको हो।

पीडित परिवारका अनुसार बालिका (परिवर्तित नाम– रिमा) पसलको पुरानो बाँकी रकम तिर्न गएकी थिइन्। सोही मौका छोपी मियाले बालिकालाई पसलभित्र लगी मोबाइलमा अश्लिल भिडियो देखाउँदै अनैतिक कार्यको प्रयास गरेका थिए।

आरोपितको हात टोकेर भागिन् पीडित बालिका

आफूमाथि जबरजस्ती गर्न खोजेपछि ती बालिकाले अभियुक्त मियाको हातमा दाँतले टोकेर उम्कन सफल भएकी थिइन्। त्यहाँबाट भागेर घर पुगेकी बालिकाले परिवारलाई घटनाबारे जानकारी गराएपछि घटना बाहिर आएको हो।

घटनापछि आक्रोशित बनेका आफन्त र स्थानीय बासिन्दा पसलमा पुग्दा मिया पसल बन्द गरी फरार भइसकेका थिए। पीडित परिवारले वडा प्रहरी कार्यालय बिर्तामा लिखित निवेदन दिए लगत्तै प्रहरीले सक्रियता बढाएको थियो। लुकिछिपी बसेको अवस्थामा मियालाई छपकैयाबाट पक्राउ गरिएको जिल्ला प्रहरी कार्यालय पर्साले जनाएको छ।

पक्राउ परेका मियामाथि अनुसन्धान भइरहेको प्रहरीले जनाएको छ। नाबालिकामाथि भएको यस जघन्य अपराधको प्रयासलाई लिएर विरगन्जवासीले कडाभन्दा कडा कारबाहीको माग गरेका छन्।