पार्टी अध्यक्ष पक्राउ परेपछि नेकपा एमालेले देशब्यापीरुपमा जनदबाव सिर्जना गर्ने भएको छ। पार्टी अध्यक्ष तथा पूर्वप्रधानमन्त्री केपी शर्मा ओलीलाई उनकै निवास गुण्डुबाट शनिबार बिहान प्रहरीले गिरफ्तार गरेको थियो।

त्यसलगत्तै नेकपा एमालेले सचिवालय बैठक बोलाएको थियो। पार्टी कार्यालय च्यासलमा बसेको बैठकले पार्टी अध्यक्ष ओलीलाई तत्काल रिहाइ गर्न माग गर्दै विभिन्न आन्दोलनका कार्यक्रमहरू पनि तय गरेको छ।

बैठकले आम जनसमुदा, नागरिक समाजको दृढताको साथ कानुनी तथा राजनीतिक रूपमा सशक्त प्रतिवाद गर्ने, प्रत्येक जिल्लाको सदरमुकाममा आज अपराह्न ३ बजे जनसंगठनहरूको तर्फबाट विरोध प्रदर्शन गर्ने, प्रत्येक जिल्लामा आइतबार १२ बजे जिल्ला पार्टी कमिटीको आयोजनामा व्यापक प्रदर्शनसहित प्रमुख जिल्ला अधिकारीलाई विरोधपत्र बुझाउने र लोकतन्त्र र कानुनी राज्यका पक्षधर सबै दलहरूसँग संवाद-सहकार्य गर्ने तथा नागरिक समाज र आम जनसमुदायसँग सहकार्य गर्ने निर्णय पनि गरेको छ।